یەكێتیی تۆپی پێی ئەوروپی لە ماڵپەری خۆیدا ئاستی هەڵبژاردە بەشدارەكانی یۆرۆی 2012ی ئاشكرا كرد كە لە تیروپشكی ئەو پاڵەوانیەتییەدا پشت بەو دابەشكردنە دەبەسترێت بۆ دابەشكردنی هەڵبژاردەكان بەسەر كۆمەڵەكاندا.
تیروپشكەكە رۆژی 2ی دیسەمبەری داهاتوو لە كیڤی پایتەختی ئۆكرانیا ئەنجام دەدرێت.
بەپێی ئاست بەندییەكە هەڵبژاردەی ئیسپانیا لەسەرووی یەك لە چوار كۆمەڵەكەی پاڵەوانیەتییەكە دەبێت و لە كۆمەڵەكەی ئەودا یەك لە هەڵبژاردەكانی ئینگلتەرا یان ئەڵمانیا یان رووسیا یان ئیتاڵیا بوونیان دەبێت و هەڵبژاردەی هۆڵەنداش پێشەوایەتی كۆمەڵەیەكی تر دەكات و پێشەوایەتی دوو كۆمەڵەكەی تر دراوەتە هەڵبژاردەكانی پۆڵەندا و ئۆكرانیا كە رێكخەری پاڵەوانیەتییەكەن.
هەڵبژاردەی ئەڵمانیا خراوەتە ئاستی دووەمەوە لە پاڵ هەڵبژاردەكانی رووسیا و ئیتاڵیا و ئینگلتەرا و ئاستی سێیەمیش بریتییە لە هەڵبژاردەكانی كرواتیا و یۆنان و پورتوگال و سوێد و ئاستی چوارەم هەڵبژاردەكانی دانیمارك و فەرەنسا و ئێرلەندا و چیك دەگرێتەوە.