رۆجێ فێدرێری مایسترۆی سویسری و چوارەمی ریزبەندی یاریزانانی تێنسی سەرزەوی ژمارەیەكی نوێی پێوانەیی تۆمار كرد دوای ئەوەی لە یاری قۆناخی هەشتی پاڵەوانیەتیی ماستەرزی پاریسدا كە نۆیەم پاڵەوانیەتیی هەزار خاڵییە سەركەوتنی مسۆگەر كرد.
كۆی خەڵاتەكانی پاڵەوانیەتیی ماستەرزی پاریس 2.75 ملیۆن یۆرۆیە.
دوای ئەو یارییە فێدرێر یاریزانی ژمارە حەوتە لە مێژووی تێنسی نوێدا بتوانێ 800 یاری لە كاروانی خۆیدا بباتەوە كە پێشتر 6 یاریزانی تر ئەو دەستكەوتەیان بەدەست هێناوە.
لە پێش فێدرێرەوە ئێستا ستیڤن ئیدبێرگ دێت كە 806 یاری بردووەتەوە، دوای ئەو ئەندرێ ئەگاسی 870 یاری، جۆن ماكنرۆ 875 یاری، هەروەها جیلیرۆم فیلاس 923 بردنەوە و ئیڤان لندن 1071 یاری و خاوەنی پلەی یەكەمیش جیمی كۆنرزی ئەفسانەیە كە 1242 یاری لە كاروانی وەرزشیی خۆیدا بردووەتەوە.