یانەی بایرن میونشنی ئەڵمانی ئاشكرای كرد یاریزانی ناوەڕاستی یانەكە باستیان شڤانشتایگەر بۆ ماوەی نزیكەی 6 هەفتە لە یاریگاكان دوور دەكەوێتەوە بەهۆی پێكانەوە.
یانەكە دوای تەواوبوونی یاری بەرامبەر یانەی ناپۆلی ئیتاڵی لە خولی یانە پاڵەوانەكانی ئەوروپا كە 3-2 بردنەوەی تێدا بەدەست هێنا، ئاشكرای كرد شڤانشتایگەر دووچاری شكانی ئێسكی شانی چەپی هاتووە دوای بەریەك كەوتنی لە سەرەتای گێمی دووەمی یارییەكەدا لەگەڵ جۆڤان ئیلنەری یاریزانی یانەی ناپۆلی.
یۆب هاینكسی راهێنەری بایرن میونشن بە رۆژنامەنووسانی راگەیاند باستیان دووچاری شكان لە ئێسكی شانیدا هاتووە و ئەمشەو نەشتەرگەری بۆ دەكرێت و بەپێی قسەی پزیشكەكان ئەو یاریزانە پێویستی بە 4 تا 6 هەفتە هەیە بۆ ئەوەی توانای گەڕانەوە بۆ ناو یاریگای هەبێت.
هەروەها گوتی كەی ماوەی پشووی دوای نەشتەرگەرییەكە دەستی پێكرد، ئەو كات بە تەواوی دەزانم كەی دەگەڕێتەوە.