كلاودیۆ رانێری راهێنەری یانەی ئینتەر میلانی ئیتاڵی گوتی بردنەوە لە یانەی لیلی پاڵەوانی فەرەنسا لە قۆناخی كۆمەڵەكانی خولی یانە پاڵەوانەكانی ئەوروپا، پاڵنەرێكی بەهێز دەداتە یاریزانانی ئینتەر میلان بۆ ئەوەی كێشەكانی رابردوویان لە بیر بكەن.
ئینتەر میلان توانی بە دوو گۆڵی بێبەرامبەر لە یانەی لیل بباتەوە كە هەردوو گۆڵەكە لە رێگەی یاریزانانی ئەرجەنتینی والتەر ساموێل و دیگۆ میلیتۆوە تۆمار كران و بەو بردنەوەیەش ئینتەر بە جیاوازییەكی باشی خاڵ پێشەنگی كۆمەڵەكەی گرت.
رانێری دوای یارییەكە گوتی لە ئاستی یارییەكە رازیم و دڵخۆشم بەوەی یاریزانان لە ناو یاریگادا كردیان و رووحێكی گەورەی بردنەوەیان پێشاندا، لەگەڵ بەردەوام بوون لەسەر ئەو شێوە یاریكردنە تیپەكە ترس لە دڵی خۆی دەردەكات و تواناكانی خۆی بەدەست دەهێنێتەوە.
رانێری هەروەها گوتی هەفتەی پێشوو یاریزانەكانم یارییەكی بەهێزیان بەرامبەر یۆڤنتۆس كرد و داوام لێكردن بە هەمان ئاستەوە بۆ یارییەكەی ئەمڕۆ ئامادەبن، یاریزانەكان ئەوەیان كرد و توانیمان سەر بكەوین، قۆناخی ترسمان تێپەڕاند.