تۆڕی سۆی مەدریدیستای ئیسپانی لە رۆژنامەكانی بەلجیكای گواستەوە كە یانەی ریال مەدرید ئیدین هازاردی یاریزانی ناوەڕاستی بەلجیكی كڕیوە.
بەپێی ئەو رۆژنامانە ریال مەدرید و یانەی لیل كە ئەو یاریزانە یاری بۆ دەكات، لەگەڵ هازارد رێكەوتوون بۆ گواستنەوەی ئەو یاریزانە بۆ ریزی ریال مەدرید.
لە بەرامبەردا رۆژنامەی لیكیپی فەرەنسی ئاشكرای كرد یاریزانەكەی لیلی پاڵەوانی فەرەنسا رەتی كردووەتەوە بچێتە یانەی پاریس سانجێرمان كە هەوڵی زۆر دەدات بۆ كڕینی ئەو یاریزانە و لەوبارەیەوە هازارد گوتویەتی پاریس شارێكی نایابە، من سەرسامم پێی، بەڵام بیر لەوە ناكەمەوە بچمە ئەوێ، نامەوێ لە یانەی لیلەوە بچمە یانەیەكی تری فەرەنسا و دەمەوێ بچمە دەرەوەی فەرەنسا.
پێشتر زینەدین زێدانی راوێژكاری سەرۆكی یانەی ریال مەدرید ئامۆژگاری هازاردی كردبوو پەیوەندی بە یانەی ریال مەدریدەوە بكات و داوای لە كارگێڕیی یانەكەشی كردبوو ئەو یاریزانە بكڕن.
نرخی هازار بەپێی رۆژنامەكان كە گوێی لە ئامۆژگارییەكەی زێدان گرتووە بە 45 ملیۆن یۆرۆ خەمڵێنراوە.