ئەندرێ ڤیلاش بواشی راهێنەری یانەی چێڵسی ئینگلیزی هەواڵێكی رۆژنامەی دەیلی میلی بەریتانی رەتكردەوە كە گوتویەتی بواش لە دوا مەشقی یانەكەیدا لە یاریزانەكانی چێڵسی توڕەبووە و پێ گوتوون ئێوە تەمبەڵن و ئەركەكانی سەرشانتان جێبەجێ ناكەن.
رۆژنامەكە دەڵێ دوای دۆڕانی چێڵسی بە ئەرسناڵ 5-3 بواش مەشقی یاریزانەكانی زیاد كردووە و پێی گوتوون رێنماییەكانی منتان جێبەجێ نەكردووە.
بەڵام راهێنەرە پورتوگالییەكە ئەوەی رەتكردەوە و گوتی ئەوە شێوازی كاری من نییە، من بە تەنیا لەگەڵ یاریزانەكان قسەم كردووە.
هەروەها گوتی ئەوەی رۆژنامەی دەیلی میل نوسیویەتی دوورە لە راستییەوە، هیچ جۆرە كێشە و توڕەیی و هەڕەشەیەك لە نێوانماندا نەبوو.
هەروەها گوتی هاواركردن بەسەر یاریزاناندا لە شێوازی كاركردنی مندا نییە، هەردەم من بە دوو شێواز مەشق دەدەم و هانی یاریزانەكان دەدەم ئەوە بڵێن كە بیری لێدەكەنەوە، چونكە ئەوان لە ناو یاریگادا پلانەكان جێبەجێ دەكەن.