یاریزانی هێلی ناوەڕاستی یانەی ئینتەرمیلان و هەڵبژاردەی هۆڵەندا ویسلی شنایدەر رایگەیاند هیچ راهێنەرێك لە جیهان نییە لە توانای راهێنەری پورتوگالی خۆزی مۆرینهۆ بێت، شنایدەر كە لە ژێر سەرپەرشتی مۆرینهۆ لە یانەی ئینتەرمیلان یاری كردووە لە لێدوانێكیدا بۆ رۆژنامەی لاگازێتا دیللۆ سپۆرتی ئیتالی گوتی: من دەزانم ئەوەی دەیڵێم بێ سوودە، بەڵام ئێمە لە گەڵ هەر راهێنەرێكی دیكە لە دوای سیفەتێكی مۆرینهۆ دەگەڕێین، بەڵام هیچ راهێنەرێك وەك مۆرینهۆ لە جیهان نییە.
هەروەها شنایدەر گوتی : هیچ راهێنەرێك نییە وەك مۆرینهۆ مامەڵە لەگەڵ یاریزانان بكات و كاتێك راهێنەرێكی دیكە دێت لە شوێنی مۆرینهۆ ئەركێكی زۆر قورسی لەسەر شان دەبێت، هەر ئەوەش بوو ئەركی راهێنەر بینیتیزی زەحمەت كرد.
شایانی باسە راهێنەر بینیتیز لە شوێنی مۆرینهۆ بووە راهێنەری یانەی ئینتەرمیلان، بەڵام ئاستی یانەی ئینتەر هاتە خوارەوە و نەیتوانی دەسكەوتەكانی مۆرینهۆ دووبارە بكاتەوە و لە كۆتاییدا لە ئەركەكەی دوورخرایەوە.