هەفتەی رابردوو لە وڵاتی رۆمانیا خولێكی پاڵاوتن بۆ دەستنیشان كردنی ناوبژیوانی نێودەوڵەتی لە یاری تۆپی بالە بەڕێوەچوو، لەم خولە یەكێتی تۆپی بالەی عێراق بە دوو ناوبژیوان بەشداری تیایدا كردبوو و هەردوو ناوبژیوان كورد بوون.
هەریەكە لە ناوبژیوانان موسا سالم و هیشام بەكر بەشدارییان لە خولێكی ناوبژیوانی نێودەوڵەتی كرد، كە لە وڵاتی رۆمانیا بەڕێوەچوو و ماوەی 12 رۆژی خایاند. لەم خولەدا هەردوو ناوبژیوانی كورد توانیان بە پلەی بەرز سەركەوتن بەدەست بێنن و بەفەرمی ببنە ناوبژیوانی نێودەوڵەتی و لە ماوەی داهاتوو دەتوانن یارییە نێودەوڵەتییەكان لە پاڵەوانێتیەكانی عەرەبی و ئاسیایی و جیهانی بەڕێوە ببەن و هەروەها بەفەرمی دەتوانن خولی ناوبژیوانی بۆ ناوبژیوانانی عێراق بۆ تۆپی بالە بكەنەوە.
جێگەی باسە هیشام بەكر لە دایكبووی شاری هەولێر و دەرچووی كۆلێژی پەرەوەردەی وەرزشی زانكۆی سەڵاحەدینە و لە پەیمانگای وەرزشی هەولێر مامۆستایە و یەكێكە لە ناوبژیوانە باشەكانی كوردستان و عێراق.