دوای داواكاریی رۆژنامەكانی ئیسپانیا لە جۆزێ مۆرینۆی راهێنەری یانەی ریال مەدرید بە پشوودان بە چابی ئەلۆنسۆی مایسترۆی ناوەڕاستی یانەی ریال مەدرید و رەتكردنەوەی ئەو یاریزانە بۆ ئەو داوایە، جۆزێ مۆرینۆی راهێنەری یانەكە بڕیاری دا پشووی سەپێنراو بەسەر ئەلۆنسۆدا جێبەجێ بكات.
ئەلۆنسۆ دوای داواكاریی رۆژنامەكان گوتی من لە دۆخێكی زۆر باشدامو هەست بە ماندووبوون ناكەم و پێویستم بەوە نییە پشوو وەربگرم.
دوێنێ رۆژنامەكانی ئیسپانیا بڵاویان كردەوە كە مۆرینۆ بڕیاری داوە لە یاری یانەكەی بەرامبەر ڤیاریال كە سبەی چوارشەمە بەڕێوەدەچێت، یاری بە ئەلۆنسۆ نەكات لە سەرەتاوە و ئەگەر پێویست بێت تا كۆتایی یارییەكە ئەو یاریزانە لەسەر كورسی یەدەگ دەهێڵێتەوە.
چابی بە گرنگترین یاریزانی پێكهاتەكەی مۆرینۆ دادەنرێت و لە وەرزی ئەمساڵدا بۆ یەك خولەكیش لە یارییەكانی یانەكەی دانەبڕاوە.
بە زمانی ژمارە ئەلۆنسۆ 720 خولەك لە لالیگا و 270 خولەك لە خولی یانە پاڵەوانەكانی ئەوروپا و 180 خولەكیش لە جامی سوپەری ئیسپانی یاری كردووە.
ئەلۆنسۆی یاریزانی چەقی ریال مەدرید كە ساڵی 2010 لەگەڵ هەڵبژاردەی ئیسپانیادا مۆندیالی بردەوە، هاوتای ئیكەر كاسیاسی گۆڵچی یانەكەیە لە زۆرترین بەشداریدا كە 1170 خولەكە و دوای ئەوانیش رۆناڵدۆ دێت كە 1113 خولەك یاری كردووە.
مۆرینۆ دەیەوێ فشاری جەستەیی لەسەر ئەلۆنسۆ كەم بكاتەوە، چونكە جیا لە یارییەكانی ریال مەدرید ئەو یاریزانە بەشداری هەموو یارییەكانی هەڵبژاردەی ئیسپانیای لە پاڵاوتنەكانی یۆرۆدا كردووە.