ماركۆ سیمونكیلی ماتۆڕسواری ئیتاڵی دوێنێ یەكشەمە گیانی لە دەستدا دوای ئەوەی لە كاتی بەشداریكردنی لە پێشبڕكێی خەڵاتی گەورەی مالیزیا بۆ ماتۆڕسكیل دووچاری رووداو هات لەسەر پانكی سیپانگ.
پێشبڕكێیەكە دوای تەنیا 4 خولەك لە دەستپێكردنی راوەستا كاتێك ماتۆڕسكیلەكەی سیمونكیلی لە ئاراستەی خۆی لە سووڕانەوەی یازدەی پێشبڕكێیەكەدا دەرچوو و خۆی كێشا بە بە ماتۆڕسكیلی هەریەك لە كۆلین ئیدواردزی ئەمەریكی و ڤالنتینۆ رۆسی ئیتاڵیدا.
سیمۆنكیلی تەمەن 24 ساڵ بەهۆی رووداوەكەوە تووشی ئازار پێگەیشتنی زۆری سەری هات، ئەمەش لەبەرئەوەی لە كاتی بەربوونەوەی لەسەر ماتۆڕسكیلەكەی خۆی بەر ماتۆڕسكیلی رۆسی و ئیدواردز كەوت.
بەهۆی هەمان رووداوەوە ئیدواردزیش لەسەر ماتۆڕسكیلەكەی بەربووەوە بەڵام ئازاری زۆری پێ نەگەیشت و رۆسی ناچاربوو بچێتە شوێنی چاككردنەوەی ماتۆڕسكیلەكان.
لە دوای رووداوەكە سیمۆنكیلی لە زەویدا بێهۆش كەوت و ئاڵای سوور كە ئاماژەیە بۆ راگرتنی پێشبڕكێیەكە بەرز كرایەوە.