تیاگۆ مۆتای یاریزانی یانەی ئینتەر میلانی ئیتاڵی دووپاتی كردەوە زوو بێ یان درەنگ لیۆنێل میسی ئەستێرەی یەكەمی یانەی بەرشەلۆنە پەیوەندی بە یانەی ئینتەرمیلانەوە دەكات.
مۆتا لە لێدوانی بۆ تەلەڤزیۆنی یانەی ئینتەر گوتی میسی هێشتا گەنجە و بەرشەلۆنەی خۆشدەوێت، بەڵام ئێستا بێت یان لە داهاتوودا حەزی گۆڕانكاری لە ناخیدا دروست دەبێت و من ئەمە بەهۆی نزیكیم لە میسییەوە دەڵێن.
مۆتا كە یەك لە دەرچووەكانی فێرگەی لاماسیای یانەی بەرشەلۆنەیە گوتی گرنگترین شتی ئەو فێرگەیە ئەوەیە كە فێری كردم پێویستە بەردەوام تۆپ بۆ هاوڕێكانم بنێرم و نەیدۆڕێنم بۆ ركابەرەكانم و چاوم لەسەر هاوڕێكانم بێت، ئەمە لە لویس ڤان گال و فیلیپ كۆكۆوە فێر بووم.
مۆتا گوتی راستە ئێستا میسی ئەستێرەی یەكەمی بەرشەلۆنەیە و لەوێ زۆر بێ كێشەیە، بەڵام هەموومان هەر واین و دواتر حەزی گۆڕانكاری لە ناخماندا دروست دەبێت و ئەو كات بیر لەوە دەكاتەوە بچێتە دەرەوەی ئیسپانیا و دڵنیام هەڵبژاردەكەی لەسەر ئینتەر میلان دەبێت.