زینەدین زێدانی ئەستێرەی پێشووی یانەی ریال مەدریدی ئیسپانی گوتی لەوانەیە بێكهام هیچ سوودێك بە یانەی پاریس سانجێرمان نەگەیەنێت ئەگەر بچێتە ریزی ئەو یانەیە.
پێشتر سەرچاوە رۆژنامەوانییەكانی فەرەنسا باسیان لەوە كردبوو كە یانەی پاریس سانجێرمانی فەرەنسی داوای لە بێكهام كردووە پەیوەندی بە ریزەكانییەوە بكات، بە تایبەت كە گرێبەستی ئەو یاریزانە مانگی داهاتوو لەگەڵ یانەی لۆس ئەنجلۆس گالاكسی ئەمەریكی كۆتایی دێت.
زێدان گوتی من و بێكهام پێشتر پێكەوە لە ریال مەدرید یاریمان كردووە، دەزانم ئەو یاریزانێكی گەورەیە و پیشەگەرە و مامەڵەیەكی دروست لەگەڵ تۆپی پێدا دەكات، ئەو یەك لەو یاریزانانە بوو كە لە مەشق و راهێناندا زۆر كارامە بوو، بەڵام دەبێ پاری سانجێرمان لەبیری نەچێت كە بێكهام ئێستا تەمەنی 36 ساڵە و لەوانەیە نەتوانێ خزمەتی یانەكە بكات.