رۆژنامەی شروقی جەزائیری گوتی 5 یاریزانی تیپی مەولودییەی حجاج لە ناوچەیەكی نزیك لە كەناراوەكانی ئیسپانیا مردن دوای ئەوەی هەوڵیان دا بگەنە ئیسپانیا.
بەپێی رۆژنامەكە ئەو 5 یاریزانە ویستی ئەوەیان هەبووە بە نهێنی بگەنە ئیسپانیا لە پێناو پەیوەندیكردن بە یانەكانی ئەو وڵاتەوە كە لەوانەیە پارەی زیاتریان وەك یاریزانی پیشەوەر بداتێ.
5 یاریزانەكە بەهۆی نغرۆبوونیان لە ئاوی نزیك كەناراوەكانی ئیسپانیادا مردن كە رۆژنامەكە دەڵێ ناچاربوون ماوەیەكی زۆر لە ئاودا مەلە بكەن بۆ ئەوەی بگەنە سەر وشكانی، بەڵام لەبەر ماندووبوونیان نەیانتوانیوە درێژە بەو كارە بدەن و خنكاون.
رۆژنامەی شروق ئاشكرای كردووە خاوەنی ئەو بەلەمەی یاریزانەكانی بەرەو ئیسپانیا پەڕاندووەتەوە، ئەوانی ناچار كردووە بە ماوەیەكی دوور بەر لە گەیشتنە كەناراوەكانی ئیسپانیا بە مەلە بڕۆن و ئەو 5 یاریزانە لە ئاودا خنكاون و ئەوانیتریش لەلایەن پۆلیسی ئیسپانییەوە گیراون.