یانەی بەرشەلۆنەی هەڵگری نازناوی خولی ئیسپانیا و پێشەنگی ئێستای خولەكە بە تۆماركردنی 26 گۆڵ پێشەنگی یانەی خاوەن بەهێزترین هێڵی هێرشبەری خولەكەی گرتووە و بە جیاوازیی 2 گۆڵ لە پێش یانەی ریال مەدریدی ركابەری سەرەكییەوەیەتی كە پلەی سێیەمی گرتووە.
بەڵام بەرشەلۆنە لەگەڵ هێرشبەرە بەهێزەكەیدا، بەرگرییەكی بەهێزیشی هەیە و تا ئێستا لە وەرزی ئەمساڵی خولی ئیسپانیدا تەنیا 4 گۆڵی لێكراوە و تەنیا یانەی لیڤانتی لە رووی بەرگرییەوە لەو بەهێزترە كە 3 گۆڵی لێكراوە و پلەی دووەمی ریزبەندی خولەكەی گرتووە.
سەرنجڕاكێش لە بەرگری یانەی بەرشەلۆنەدا ئەوەیە كە ماوەی 6 مانگە لەسەر یاریگای خۆی هیچ گۆڵێكی لێنەكراوە لە خولی ئیسپانی و دوا گۆڵ كە لەو یانەیە كراوە مێژووەكەی دەگەڕێتەوە بۆ 9ی ئەپریلی رابردوو كە میگویل ئەنخل كۆرۆنای یاریزانی یانەی ئەلمێریا تۆمار كرد لەو یارییەدا كە یانەی بەرشەلۆنە 3-1 بردییەوە.
بەڵام لە خولی یانە پاڵەوانەكانی ئەوروپادا دۆخەكە بەو شێوەیە نییە و یانەی میلان توانی 2 گۆڵ لە یانەی بەرشەلۆنە بكات لەسەر یاریگای خۆی.