هەردوو هەڵبژاردەی ئیسپانیای هەڵگری نازناو و هۆڵەندا ئەگەری كەوتنە ناو كۆمەڵەیەكی زۆر قورسیان لێدەكرێت لە كاتی ئەنجامدانی تیروپشكی یارییەكانی یۆرۆی 2012 كە رۆژی 2ی كانوونی یەكەمی داهاتوو ئەنجام دەدرێت.
ئیسپانیا و هۆڵەندا و ئۆكرانیا و كرواتیان خراونەتە ئاستی یەكەمی هەڵبژاردە بەشدارەكانی پاڵەوانیەتییەكەوە.
یەكێتیی تۆپی پێی ئەوروپا لە دیاریكردنی ئاستی هەڵبژاردە بەشدارەكانی پاڵەوانیەتییەكەدا بۆ 4 ئاست، پشت بە ئەنجامی هەڵبژاردەكان لە كۆتاییەكانی یۆرۆی 2008 و مۆندیالی 2010 و پاڵاوتنەكانی ئەوروپای 2012 دەبەستێت.
بەو پێیە ئەو هەڵبژاردانەی لە ئاستی دووەم دادەنرێن دۆخیان زۆر باشتر دەبێت لەو هەڵبژاردانەی لە ئاستی یەكەمن، چونكە هەڵبژاردەكانی ئاستی دووەم لەوانەیە بكەونە ئەو كۆمەڵانەوە كە ئۆكرانیا و پۆڵەندا پێشەوایەتی دەكەن، لەبەرئەوەی ئەو دوو هەڵبژاردەیە لە هەڵبژاردەكانی تر لاوازترن.
بەپێی ئەو ئاستەی دانراوە، هەردوو هەڵبژاردەی ئیسپانیا و هۆڵەندا هەریەكەیان پێشەوایەتی كۆمەڵەیەك دەكات و لە هەریەكێكیان رووبەڕووی یەك لە هەڵبژاردەكانی ئەڵمانیا، ئینگلتەرا، ئیتاڵیا و كرواتیا دەبنەوە (ئەگەر كرواتیا لە پاشكۆی پاڵاوتنەكاندا سەربكەوێت)، ئەمە لە كاتێكدا پورتوگال (ئەگەر سەركەوت) لە ئاستی سێیەم دەبێت و فەرەنسا لە ئاستی چوارەم دەبێت و بۆیە ئاساییە ئەگەر كۆمەڵەیەك ببینین لە یۆرۆی 2012 كە هەڵبژاردەكانی بریتی بن لە ئیسپانیا، ئەڵمانیا، پورتوگال و فەرەنسا.