گرێبەستی گواستنەوەی یارییەكانی خولی ئینگلیزی لە رێگەی تەلەڤزیۆنەوە كێشەیەكی گەورەی رووبەڕووبووەتەوە دوای ئەوەی یانەی لیڤەرپوول ئاشكرای كرد دەیەوێ مافی گواستنەوەی یارییەكانی خولەكە لە دەرەوەی ئینگلتەرا بەشێوەی تاك بفرۆشرێت نەك بە كۆمەڵ.
بەپێی ئەو گرێبەستەی ئێستا كراوە و لە 2010 تا 2013 دەخایەنێت و بڕەكەی 5 ملیار دۆلارە، هەموو یارییەكان بە شێوەی كۆمەڵ دەفرۆشرێن و داهاتەكەی بە یەكسانی لە نێوان هەموو یانەكاندا دابەشدەكرێت.
ئایان ئایری بەڕێوەبەری كارگێڕیی یانەی لیڤەرپوول گوتی پێویستە یانەكان هەریەكە و یارییەكانی خۆی لە دەرەوەی ئینگلتەرا بە جیا بفرۆشێتەوە، چونكە ئەوە پارەی زیاتر دەداتە یانەكان.
ئایری گوتی گۆڕانكاری رووی داوە و یانەكان ئێستا لەسەر ئاستی جیهان ناسراوە، لەوانەیە لە داهاتوویەكی نزیكدا وەك ئیسپانیا بكەین و بمانەوێ یارییەكانی خۆمان بە تەنیا بفرۆشینەوە.
ئەو بەرپرسەی لیڤەرپوول گوتی لە ئینگلتەرا ئاساییە هەرچۆنێك بێت، بەڵام لە دەرەوەی هەر یانە گەورەكان بینەریان هەیە و خەڵك پارە دەدات بۆ بینینی یارییەكانیان لە رێگەی تەلەڤزیۆنەوە، ئیدی چۆن دەكرێ لیڤەرپوول و چێڵسی و مانچستەر و یانەیەك كە ئەمساڵ هاتووەتە خولی نایابی ئینگلیزییەوە یەك بڕە پارە وەربگرن.
بەرپرسەكەی لیڤەرپوول گوتی ئێستا پێویستیمان بە پێداچوونەوە بەو رێكەوتنە هەیە و دەبێ شتێكی تر بكەین، ئەگەر نا هەڵوێستی تر وەردەگرین.