پیپ میلی راهێنەری یانەی ریال بیتس گوتی كاتێك دەچینە یاریگای سانتیاگۆ برنابیۆ بۆ رووبەڕووبوونەوەی یانەی ریال مەدرید دوای دوو هەفتەی تر، ئێمە لە لوتكەی خولی ئیسپانیداین.
میل بە رۆژنامەنووسانی راگەیاند، لە پێشەنگی خولەكەین كاتێك دەچینە میوانداریی ریال مەدرید، چونكە هەفتەی داهاتوو لە لیڤانتی دەبەینەوە.
یانەی ریال بیتس كە لە وەرزی ئەمساڵدا بۆ ریزی یانە پلە یەكەكانی ئیسپانیا گەڕاوەتەوە، دوێنێ دووشەمە وێڕای دۆڕانی 1-0 بە یانەی خیتافی، لە پێشەنگی ریزبەندی یانەكانی خولەكە ماوەتەوە.
دۆڕانەكەی دوێنێی یانەی بیتس یەكەم دۆڕانی ئەم وەرزەی یانەكەیە دوای ئەوەی 4 بردنەوەی لەسەریەكی تۆمار كرد و بە 12 خاڵ پێشەنگی خولەكەی گرت.
رۆژی 15ی مانگی داهاتوو، یانەی ریال بیتس لە هەفتەی هەشتەمی خولەكەدا رووبەڕووی یانەی ریال مەدرید دەبێتەوە لەسەر یاریگای سانتیاگۆ برنابیۆ و راهێنەری ئەو یانەیە گوتی هیچ جیاوازییەك لە نێوان ریال مەدرید و ئەو یانانەدا نییە كە لێمان بردوونەتەوە، شكست پێهێنانی ریال مەدرید كارێكی ئاساییە.