لە هۆڵی زالگریس لە وڵاتی لیتوانیا یارییەكانی جامی نەتەوەكانی ئەوروپا لە یاری تۆپی باسكە كۆتایی هات و هەڵبژاردەی ئیسپانیا بۆ جاری دووەم لەسەر یەك نازناوەكەی بەدەست هێنا، لە یاری كۆتاییدا هەڵبژاردەی ئیسپانیا رووبەڕووی هەڵبژاردەی فەرەنسا بۆوە، ئیسپانییەكان بە رابەرایەتی هەردوو برا پاو گاسۆل و مارك گاسۆل كە لە خولی NBA یاری دەكەن یارییەكەیان بردەوە بە ئەنجامی 98 خاڵ بەرامبەر 85 خاڵ، لەم یارییەدا یاریزانانی ئیسپانیا كە زۆربەیان لە خولی NBA یاری دەكەن ئاستێكی بەرزیان پێشكەش كرد و بە شایستەیی بوونە پاڵەوانی ئەوروپا و گەیشتنیان بۆ یارییەكانی ئۆلۆمپیادی لەندەن 2012 مسۆگەر كرد، لەو كاتەی یاریزانی ئیسپانی خوان كارلۆس نەڤارۆ خەڵاتی باشترین یاریزانی خولەكەی وەرگرت.لە لایەكی دیكەوە لە یاری دیاریكردنی پلەی سێیەم و چوارەم، هەڵبژاردەی روسیا بە ئەنجامی 72 خاڵ بەرامبەر 68 خاڵ لە هەڵبژاردەی مەقدۆنیای بردەوە و پلەی سێیەمی خولەكەی مسۆگەر كرد.