رۆبەرتۆ مانشینی راهێنەری یانەی مانچستەر سیتی رایگەیاند یانەكەی پێویستی بە یاریزانی تازە هەیە لە قۆناغی داهاتوو بۆ ئەوەی بتوانێت ململانێ لەسەر نازناوەكان بكات، یانەی مان سیتی لە سێ وەرزی رابردوو زیاتر لە 300 ملیۆن پاوەندی خەرجكردووە لە كڕینی كۆمەڵێك ئەستێرەی تۆپی پێی جیهانی كە دواترینیان یاریزان سیرجیۆ ئەگوێرۆ بوو بەرامبەر 38 ملیۆن پاوەند.
رۆبەرتۆ مانشینی لە لێدوانێكیدا بۆ رۆژنامەی میرەری بەریتانی گوتی: تیپەكەمان پێویستی بە یاریزانی تازە هەیە، ئێمە یاریزانی زیاد لە پێویست تەنها لە هێرشبەران و دوو باڵەكەی بەرگری چەپ و راستمان هەیە، بەڵام لە شوێنەكانی دیكە بە پێكانی هەر یاریزانێكی سەرەكی كێشەمان بۆ دروست دەبێت چونكە یاریزانی یەدەگمان نییە، بۆ نمونە لە شوێنی یاریزانی ناوەڕاستی بەرگری تەنها نایجل دی یۆنگ و جیمس میلنەرمان هەیە كە پێكانیان تووش دێت، یاریزانێك نییە شوێنیان بگرێتەوە.