تۆڕی سكای سپۆرتی ئینگلیزی ئاشكرای كرد ئاستی لویس نانی بە بەراوورد بە ئاستی كریستیانۆ رۆناڵدۆ ئەوكاتەی یاریزانی مانچستەر یونایتد بوو باشترە.
نانی لە دوای رۆیشتنی رۆناڵدۆوە بۆ یانەی ریال مەدرید بە گەورەترین گرێبەست كە بەهاكەی گەیشتە 96 ملیۆن یۆرۆ، ئاستێكی باشتر لەگەڵ مان یو پێشان دەدات و گۆڵی زیاتریش تۆمار دەكات.
تۆڕەكە بەراوردی لە نێوان یەكەمین 100 یاری هەردوو یاریزان بۆ یانەی مانچستەر یونایتد كردووە و دەری خستووە نانی لە رۆناڵدۆ باشترە.
نانی یەكشەمەی رابردوو رۆڵێكی گەورەی هەبوو لە سەركەوتنی تیپەكەی بەسەر یانەی چێڵسی لە خولی ئینگلیزی 3-1 و گۆڵی دووەمی یانەكەی بە شێوەیەكی زۆر جوان تۆمار كرد.
بەپێی تۆڕەكە لە یەكەمین 100 یاریدا، نانی 33 گۆڵی دروستكردووە، لە كاتێكدا رۆناڵدۆ تەنیا 12 گۆڵی دروستكردووە و لە گۆڵ كردنیشدا هەردوو یاریزان وەك یەكن بە تۆماركردنی 19 گۆڵ.