دەستەی كارگێڕی یانەی هەولێر بەفەرمی گرێبەستی لەگەڵ 7 یاریزانی تیپی دووەمی یانەكە مۆركرد بۆ ئەوەی لە وەرزی داهاتوو لە ریزی تیپی یەكەم یاری بكەن لە خولی بژاردەی عێراق و جامی یەكێتی ئاسیا.
ئەم حەوت یاریزانە لەسەر داوای راهێنەر ئەیوب ئۆدیشو بوو، كە لە وەرزی رابردوو توانیان ئاستێكی بەرز لەگەڵ تیپی دووەمی یانەی هەولێر لە كوردستان پێشكەش بكەن و ببنە جێگەی رازمەندی دەستەی راهێنەرانی تیپی یەكەم.
یاریزانەكانیش بریتین لە (میران خەسرۆ، ئامانج كەریم، تاڵیب رەقیب، ئارام سلێمان، نەوزاد شێرزاد، محەمەد خالید، نیاز محەمەد).
گرێبەستی هەر یاریزانێك 20 ملیۆن دینارە و مووچەی مانگانەیان 700 هەزار دینارە و بۆ ماوەی یەك وەرز گرێبەستیان مۆركردووە.
جێگەی باسە لەگەڵ بانگهێشت كردنی ئەم حەوت یاریزانە ئێستا لە ریزی تیپی یەكەمی یانەی هەولێر 12 یاریزانی كورد هەیە.