ئەندرێ ڤیلاش بواشی راهێنەری یانەی چێڵسی ئینگلیزی گوتی ئەنجامدانی تەنیا 5 یاری بەس نییە بۆ حوكمدان لەسەر توانای هیچ راهێنەرێك.
بواش سبەی یەكشەمە یارییەكی قورس چاوەڕێی دەكات كاتێك یانەكەی رووبەڕووی یانەی مانچستەر یونایتدی ئینگلیزی دەبێتەوە.
بواش لە كۆنگرەیەكی رۆژنامەنووسیدا گوتی هەر بڕیارێك لەسەر راهێنەرێك بدرێ دوای تەنیا 5 یاری، ئەوە گوناهی راهێنەرەكە نییە بەڵكە هی ئەوانەیە كە بڕیاریان لەسەر داوە.
راهێنەرە پورتوگالییەكە گوتی ئەنجامی یاری یانەكەم بەرامبەر یانەی مانچستەر هیچ مانایەكی نییە، هەروەها گوتی لەم یارییەدا هەرچییەك رووبدات هیچ مانایەكی نییە، لەوانەیە پاڵنەری سەرەكی ئەوەبێت كە هەردوو تیپ دەیانەوێ ببەنەوە و هەردوولاش پاڵێوراون بۆ بردنەوە، بەڵام با بزانین چی روودەدات.
لەبارەی هەلی بردنەوەی یارییەكە لەلایەن یانەكەیەوە گوتی یارییەكە لە كاتێكی باشدا بۆ ئێمە هاتووە، هەردوو تیپ پاڵنەری زۆریان بۆ بردنەوە هەیە، ئومێدەوارم ببەینەوە و یارییەكی باش بكەین.