رافایل نادالی یاریزانی تێنسی سەرزەوی ئیسپانیا چووە پاڵ یاریزانانی هەڵبژاردەی ئیسپانیا كە خۆیان بۆ رووبەڕووبوونەوەی هەڵبژاردەی فەرەنسا لە یاری پێش كۆتایی جامی دیفز ئامادە دەكەن لە شاری قورتوبەی ئیسپانی.
نادال بەشداری لە مەشقەكانی هەڵبژاردەكەی كرد دوای تەنیا 17 سەعات لە دۆڕانی یاری كۆتایی پاڵەوانیەتیی تێنسی كراوەی ئەمەریكا لە بەرامبەر نۆڤاك جۆكۆڤیجی سڕبی.
جۆكۆڤیج توانی نادال لە نازناوەكەی پێشووی لە پاڵەوانیەتیی ئەمەریكای كراوە بێبەش بكات دوای ئەوەی 3-1 لێی بردەوە لەو یارییەدا كە 4 سەعات و 10 خولەكەی خایاند.
نادالی دووەمی ریزبەندی یاریزانانی تێنسی سەرزەوی لە جیهان، بە ئامادەبوونی ئەلبێرت كۆستای كاپتنی هەڵبژاردەی ئیسپانیا دەستی بە مەشقەكانی لەگەڵ هەڵبژاردەی تێنسی ئیسپانیا كرد.
ئیسپانیا تا ئێستا 4 جار نازناوی جامی دیفزی بەدەست هێناوە.