ڤیسنتی دیل بۆسكی راهێنەری هەڵبژاردەی ئیسپانیا هەڕەشەی لە فرناندۆ تۆرێسی هێرشبەری هەڵبژاردەكەی كرد و گوتی ئەو ئەگەر لەسەر گۆڵ نەكردن لەگەڵ یانەی چێڵسی بەردەوام بێت جارێكی تر نایەتەوە هەڵبژاردەی ئیسپانیا.
لە دوو یاری ئەم هەفتەیەی هەڵبژاردەی ئیسپانیادا كە بەرامبەر هەڵبژاردەی چیلی و لیخنشتاین ئەنجامی دا، تۆرێس تەنیا لە یاری یەكەمدا چەند خولەكێكی كەم یاری كرد و لە بری ئەو دیل بۆسكی پشتی بە داڤید ڤیا و ئەلڤارۆ نیگریدۆ بەست كە توانییان سەركەوتووانە ئەركی خۆیان جێبەجێ بكەن.
هەڵبژاردەی ئیسپانیا دوای بردنەوە لە هەڵبژاردەی لیخنشتاین 6-0 سەركەوتنی بۆ كۆتاییەكانی یۆرۆی 2012 مسۆگەر كرد و لە دوای یارییەكە راهێنەری ئیسپانیا بە رۆژنامەنووسانی راگەیاند، تۆرێس یاریزانێكی گرنگە، بەڵام یاریزانی گرنگ دەبێ سەرەتا لە یانەكەی ئاستی بەرز بێت بۆ ئەوەی لە هەڵبژاردەكەشیدا جێگەی متمانە بێت، ئەمە ناكرێ بە پێچەوانەوە روو بدات.
تۆرێس زستانی رابردوو بە بڕی زیاتر لە 50 ملیۆن پاوەند پەیوەندی بە یانەی چێڵسییەوە كرد و تا ئێستا تەنیا یەك گۆڵی بۆ ئەو یانەیە تۆمار كردووە.