بڕیارە سبەی لەگەڵ راكێشانی تیروپشكی قۆناخی كۆمەڵەكانی خولی یانە پاڵەوانەكانی ئەوروپادا، باشترین یاریزانی وەرزی رابردووی ئەوروپاش دەست نیشان بكرێ.
یەكێتیی تۆپی پێی ئەوروپا ئاشكرای كردووە نازناوی باشترین یاریزانی ئەوروپا بۆ وەرزی رابردوو لە نێوان هەر سێ یاریزان لیۆنێل میسی ئەرجەنتینی، كریستیانۆ رۆناڵدۆی پورتوگالی و چاڤی هێرناندێزی ئیسپانیدایە.
میسی وەرزی رابردوو پێشەوایەتی بەرشەلۆنەی كرد بۆ بردنەوەی نازناوی خولی ئیسپانیا و خولی یانە پاڵەوانەكانی ئەوروپا و لە خولی ناوخۆی ئیسپانیادا میسی 31 گۆڵی بۆ یانەكەی تۆمار كرد. لە كاتێكدا كریستیانۆ رۆناڵدۆ وەرزی رابردوو پێشەوایەتی یانەی ریال مەدریدی كرد بۆ بردنەوەی نازناوی جامی شای ئیسپانیا و سەركەوتن بۆ یاری پێش كۆتایی خولی یانە پاڵەوانەكانی ئەوروپا لە كاتێكدا ریال مەدرید زیاتر لە 8 ساڵ بوو نەگەیشتبووە ئەو قۆناخە.
رۆناڵدۆ نازناوی گۆڵكەری ئەوروپای بەدەست هێنا لە وەرزی رابردوودا و بەوەش خەڵاتی پێڵاوی زێڕینی وەرگرت.
هەرچی چاڤی هێرناندێزی ئەستێرەی ناوەڕاستی یانەی بەرشەلۆنەیە رۆڵی گەورە و بەرچاوی هەبوو لە بردنەوەكانی یانەی بەرشەلۆنە لە وەرزی رابردوودا.