یانەی ئەرسناڵی ئینگلیز لە گەڕەكانی داهاتووی خولی ئینگلتەرا و یارییەكەی ئەمشەوی بەرامبەر یانەی ئۆدینێزی ئیتاڵی دووچاری گرفت دەبێت بەهۆی پێكانی هەندێك لە یاریزانەكانی و رۆیشتنی هەندێكی ترەوە.
بەپێی ئەوەی ئاژانسەكانی دەنگوباس بڵاویان كردووەتەوە، ویلشێر لە قاچی راستی دووچاری پێكان هاتووە و ئارسن ڤینگەری راهێنەری یانەكەش ئاشكرای كردووە ویلشێر لە چەند هەفتەی داهاتوودا یاری ناكات.
راهێنەری ئەرسناڵ دەڵێ ویلشێر سەرلەنوێ دووچاری پێكان هاتووە، ئەمە كارێكی جێگەی داخە، لەبەرئەوەی بۆ ماوەی 2 تا 3 هەفتە لە تواناكانی ئەو بێبەش دەبین.
ئەرسناڵ ئەمشەو رووبەڕووی یانەی ئۆدینێزی ئیتاڵی دەبێتەوە و یاری چوونی لە یاریگەی خۆیدا 1-0 بردەوە و پێویستە لەسەر پارێزگاری لەو سەركەوتنە بكات، ئەگەر نا كێشەكانی یانەكە بە چوونە دەرەوە لە خولی یانە پاڵەوانەكانی ئەوروپا زیاتر دەبێت.