یاریزانی لاوی هەڵبژاردەی بەرازیل و یانەی سانتۆس پاولۆ هینریكی گانزۆ رایگەیاند یاریكردن بۆ یانەی ریال مەدرید وەك خەونێكە كە بە هیوایە بێتە دی و ئاماژەی بەوەش كرد كە ئەو هاندەری یانەی شاهانەیە، گانزۆ كە بە ریڤالدۆی تازە ناسراوە لە چاوپێكەوتنێكدا لەگەڵ رۆژنامەی ماركای شاری مەدرید دانی بەوە دانا كە ئەگەر هەلی یاریكردنی لەگەڵ یانەی ریال مەدرید بۆی بڕەخسێت ئەوە لە دەستی نادات و بەخۆشحاڵییەوە قبوڵی دەكات.
گانزۆ كەئێستا تەمەنی 22 ساڵە گوتی: سەبارەت بە خۆم یاریكردن بۆ یانەی ریال مەدرید لە داهاتوودا خەونێكە و هیوادارم بێتە دی چونكە من هاندەری ریال مەدریدم.
دەربارەی یاریزان نیمار داسیلڤا گانزۆ گوتی: ئەگەر هاتە یانەی ریال مەدرید ئەوە هاندەران خۆشیان دەوێت چونكە یاریزانێكی لێهاتووە و لەگەڵ شێوازی یاریكردنی ریال دەگونجێت.
شایانی باسە یاریزان گانزۆ لەلایەن چەندین یانەوە داواكراوە وەك ئەی سی میلان و پاریس سان جێرمان بەڵام یانەی سانتۆس دەستبەرداری نابێت تا دوای یارییەكانی مۆندیالی یانەكان لە كۆتایی ساڵی 2011.