رۆژنامەكانی بەرازیل ئەمڕۆ ئاشكرایان كردووە كە یانەی ریال مەدرید گرێبەستێكی نهێنی لەگەڵ نیمار دا سیلڤای هێرشبەری لاوی بەرازیلیدا ئیمزا كردووە و ئەو یاریزانە زستانی ئەمساڵ یان هاوینی داهاتوو پەیوەندی بەو یانەیەوە دەكات.
رۆژنامەكان دەڵێن نیمار و باوكی لەگەڵ رۆناڵدۆی دیاردەی بەرازیلیدا دانیشتوون و گرێبەستی ئەوەیان ئیمزا كردووە كە ئەو یاریزانە هاوینی داهاتوو پەیوەندی بە یانە ئیسپانییەكەوە بكات.
بەپێی ئەو رۆژنامانە نیمار دووپاتی ئەوەی كردووەتەوە كە خەون بە چوونە ریزی ریال مەدریدەوە دەبینێت و ئامادەیە هاوینی داهاتوو پەیوەندی بەو یانەیەوە بكات و لە بەرامبەردا ریال مەدرید لەسەر ئەو شێوازی كڕینە رازی بووە بەو مەرجەی گرێبەستەكە ئاشكرا نەكرێت تا كاتی خۆی.