لیۆنێل میسی پێشەوایەتی یانەی بەرشەلۆنەی كرد بۆ بردنەوەی نازناوی جامی سوپەری ئیسپانیا دوای ئەوەی لە یاری گەڕانەوەی نێوان یانەكەی و یانەی ریال مەدرید توانی گۆڵێك دروست بكات و دوو گۆڵیش تۆمار بكات بۆ ئەوەی یانەكەی 3-2 بباتەوە.
یارییەكە وەك یاری چوونی جامی سوپەر لە سەرەتاوە بە پاڵەپەستۆ و ئاستی باشتری ریال مەدرید دەستی پێكرد كە بەرشەلۆنەی ناچار كرد بگەڕێتەوە یاریگای خۆی و چەند هەلێكی ئاسانیش لە دەست بدات، تا ئەو كاتەی میسی تۆپێكی جوانی بۆ ئینێستا نارد و ئەو گۆڵی یەكەمی یانەكەی تۆمار كرد.
ریال مەدرید لە پاڵەپەستۆ خستنە سەر یانەی بەرشەلۆنە بەردەوام بوو تا ئەوكاتەی كریستیانۆ رۆناڵدۆ لە خولەكی 20 گۆڵی بەرامبەری ریال مەدریدی تۆمار كرد و لە خولەكی 45 میسی جارێكی تر دەركەوت و یاری بە بەرگریكەرانی ریال مەدرید كرد و گۆڵی پێشكەوتنی تیپەكەی تۆمار كرد.
گێمی دووەم رووداوە گەرمەكانی بۆ 10 خولەكی كۆتایی یارییەكە هەڵگرت و تا ئەوكاتە یارییەكە وێڕای دابەزینی ئاستی، كۆنترۆڵی یاریگەی لەلایەن ریال مەدریدەوە بەخۆوە بینی و لە خولەكی 82 كەریم بنزیمە شێوان و تێكچوونی شیرازەی هێڵی بەرگری بەرشەلۆنەی قۆستەوە و گۆڵی یەكسانی تیپەكەی تۆمار كرد.
بەڵام لە خولەكی 89 جارێكی تر میسی دەركەوتەوە و توانی گۆڵی سێیەمی بەرشەلۆنە تۆمار بكات و یانەكەی بكاتە خاوەنی نازناوی جامی سوپەری ئیسپانی بۆ هەشتەمین جار لە مێژووی خۆیدا.