یانەی بەرشلۆنە بە فەرمی بۆندێكی بۆ ماوەی پێنج ساڵ لە گەڵ یاریزانی هەڵبژاردەی چیلی ئەلێكسیس سانشێز مۆركرد، لەكۆنگرەیەكی رۆژنامەوانیدا سانشێز خۆشحاڵی خۆی دەڕبری بە پەیوەندیكردنی بە یانەی بەرشلۆنە و بە باشترین یانەی جیهانی وەسفكرد، سانشێز كە درێسی ژمارە 9ی وەرگرت دووپاتیكردەوە كە هاتنی بۆ یانەی بەرشلۆنە خەونێك بوو هاتە دی، چونكە لەگەڵ ئەم یانەیە دەتوانێنێت نازناوەكان بەدەست بهێنێت، سانشێز گوتی: باوكم داوای لێكردم كە لە بەرشلۆنە یاری بكەم، ئامانجی یەكەمم بەدەستهێنانی نازناوەكانە و پلەی یەكەم و میدالیای زێڕە نەك پلەی دووەم و میدالیای زیو.
دەربارەی ململانێی نێوان ریال مەدرید و بەرشلۆنە سانشێز گوتی: كاتێك بەرامبەریان یاری دەكەین پێویستە سەركەوتن تۆماربكەین و نازناوەكان ببەینەوە، تا ئێستا بیرم لە یاری سوپەری ئیسپانیا نەكردۆتەوە بە هەر حاڵ دەبێ لێیان ببەینەوە.
دەربارەی یاریزانانی بەرشلۆنە سانشێز دووپاتیكردەوە كە شانازی بەوە دەكات لە گەڵ یاریزانان میسی و زاڤی و ئەنێستا و ئەلڤێس یاری دەكات و هەوڵ دەدات ئەزمونی زیاتر لەم یاریزانانە وەربگرێت و هیوای ئەوەی خواست بە زووترین كات دەست بە مەشقەكان بكات بۆ ئەوەی بە زووترین كات خۆی بگونجێنێت لە تیپەكەدا و سوپاسی هاندەرانیشی كرد بۆ ئەو پێشوازییە گەرمەی كە لێیكرا لەكاتی گەیشتنی بۆ شاری بەرشلۆنە.