مەلەگە نۆیەم یاریزانی بردە ریزەكانی خۆیەوە
یانەی مەلەگە بە فەرمی گرێبەستكردنی لەگەڵ سانتی كازۆرلای ئەستێرەی ناوەڕاستی یانەی ڤیاریالی ئیسپانی راگەیاند بە گرێبەستێك كە بڕەكەی گەیشتە 19 ملیۆن یۆرۆ.
كازۆرلا كە لە یەدەگەكانی هەڵبژاردەی ئیسپانیای بەشدار لە یۆرۆی 2008 بوو، بەهۆی پێكانەوە نەیتوانی بەشداری لە مۆندیالی 2010ی باشووری ئەفەریقادا بكات.
كازۆرلای تەمەن 26 ساڵ، بووە گرانترین گرێبەستی یانەی مەلەگە لە مێژووی خۆیدا كە لەلایەن مانوێل پلگرینی راهێنەری پێشووی یانەكانی ڤیاریال و ریال مەدریدەوە سەرپەرشتی دەكرێت و ئەمساڵ دەیەوێ ركابەرێكی بەهێز بێت بۆ یانە زەبەلاحەكانی خولی ئیسپانی.
یانەی مەلەگە بە هێنانی كازۆرلا گەیشتە نۆیەمین گرێبەستی خۆی لە هاوینی ئەمساڵدا دوای ئەوەی پێشتر گرێبەستی لەگەڵ هەریەك لە رۆد ڤان نیستەلڕۆی، دیگۆ بۆناتۆنی، ناچۆ مۆنریال، یۆریس ماتیانسن، جیریمی تولالان، سێجیۆ سانچێز، خواكین و ئیسكۆ كردبوو.
