هەڵبژاردەی ئیسپانیای پاڵەوانی مۆندیالی 2010ی باشووری ئەفەریقا، بە پێشەنگی هەڵبژاردەكانی جیهان مایەوە لە دوا ریزبەندی یەكێتیی تۆپی پێی جیهاندا كە دوێنێ بڵاوكرایەوە.
لە ریزبەندییە نوێیەكەدا ئیسپانیا لە پلەی یەكەم مایەوە وەك 13 مانگی رابردوو كە لە دوای بردنەوەی نازناوی مۆندیالەوە ئەو پلەیەی گرتووە و هەڵبژاردەی ئۆرۆگوای پاڵەوانی كۆپا ئەمەریكاش هاتە پلەی پێنجەم و بەوەش بازێكی مێژوویی دا لە ریزبەندەكەدا.
هەروەها هەڵبژاردەی پاراگوای دووەمی كۆپا ئەمەریكا 6 خانە لە ریزبەندەكەدا هاتە پێشەوە و گەیشتە پلەی بیست و شەش.
لە ریزبەندییەكەدا هەڵبژاردەی هۆڵەندا پلەی دووەمی پێشووی خۆی پاراست و لە دوای ئەویش هەڵبژاردەی ئەڵمانیای سێیەمی مۆندیالی پێشوو هات و دوای ئەوانیش هەڵبژاردەی بەرازیل هات كە لە كۆپا ئەمەریكای پێشوودا لە قۆناخی هەشت كرایە دەرەوە.