لە یاریگای كۆمەرزینك ئەرینا لە شاری فرانكفۆرت لە وڵاتی ئەڵمانیا یارییەكانی شەشەمین مۆندیالی ئافرەتان لە یاری تۆپی پێ كۆتایی هات و هەڵبژاردەی ئافرەتانی ژاپۆن بۆ یەكەمجار لە مێژووییدا نازناوەكەی بەدەست هێنا، دوای ئەوەی لە یاری كۆتایی بە لێدانی یەكلاكەرەوەی سزا لە هەڵبژاردەی ئەمریكای بردەوە. كاتی یاسایی و زیاد كراوی یارییەكە بە دوو گۆڵ بۆ هەر لایەك كۆتایی هات، گۆڵەكانی ئەمەریكا كچە یاریزانان (مۆرگان و ئابی وامباخ) لە خولەكەكانی 69 و 104 تۆماریان كرد و گۆڵەكانی ژاپۆن كچە یاریزانان (ئایا مەیاما و هۆماری ساوا) لە خولەكەكانی 81 و 117 تۆماریان كرد، لە لێدانی یەكلاكەرەوە ئافرەتانی ژاپۆن توانیان سێ گۆڵیان تۆمار كرد لەو كاتەی ئافرەتانی ئەمەریكا تەنها یەك گۆڵیان تۆمار كرد و ژاپۆن بووە پاڵەوانی مۆندیالی 2011، لەلایەكی دیكەوە هەڵبژاردەی ئافرەتانی سوید پلەی سێیەمیان بەدەست هێنا دوای ئەوەی لە یاری پلەی سێیەم و چوارەم بە دوو گۆڵ بەرامبەر گۆڵێك لە هەڵبژاردەی ئافرەتانی فەرەنسای بردەوە.
خەڵاتەكانی مۆندیالی 2011 لە كۆتایی یارییەكە لە لایەن جۆزێف سیپ پلاتەر سەرۆكی فیفا دابەشكرا كە بریتیبوون لەم خەڵاتانە:
* خەڵاتی یەكەم بۆ هەڵبژاردەی ژاپۆن و خەڵاتی دووەم بۆ هەڵبژاردەی ئەمەریكا و خەڵاتی سێیەم بۆ هەڵبژاردەی سوید و خەڵاتی چوارەم بۆ هەڵبژاردەی فەرەنسا.
* خەڵاتی باشترین كچە یاریزان: هوماری ساوا لە ژاپۆن خەڵاتی تۆپی زێڕین، ئابی وامباخ لە ئەمەریكا خەڵاتی تۆپی زیوین، هوپ سۆلۆ لە ئەمەریكا خەڵاتی تۆپی برۆنز.
* خەڵاتی گۆڵكەر: هوماری ساوا لە ژاپۆن خەڵاتی لاپچینی زێڕین بە تۆماركردنی 5 گۆڵ، مارتا لە بەرازیل خەڵاتی لاپچینی زیوین بە تۆماركردنی 4 گۆڵ، ئابی وامباخ لە ئەمەریكا خەڵاتی لاپچینی برۆنز بە تۆماركردنی 4 گۆڵ.
* خەڵاتی باشترین گۆڵچی : هوپ سۆلۆ لە ئەمەریكا خەڵاتی دەستكێشی زێڕینی وەرگرت.
* خەڵاتی یاری پاك : هەڵبژاردەی ژاپۆن.
* خەڵاتی باشترین كچە یاریزانی لاو: كاتلین فۆرد لە ئوستورالیا.
شایانی باسە یارییەكانی مۆندیالی ئافرەتان لە ساڵی 1991 دەستی پێكردووە و ئەمەریكا یەكەم نازناوی بەدەست هێنا و لە ساڵی 1995هەڵبژاردەی نەرویژ نازناوەكەی بەدەست هێنا و لە ساڵی 1999 جارێكی دیكە ئەمەریكا بووە پاڵەوان و لە ساڵانی 2003 و 2007 ئافرەتانی ئەڵمانیا جامەكەیان بەرز كردەوە .
مۆندیالی 2015 ی ئافرەتان لە وڵاتی كەنەدا ئەنجام دەدرێت و بۆ یەكەمجار ژمارەی هەڵبژاردە بەشداربووەكان بۆ 24 هەڵبژاردە بەرز دەبێتەوە.