یانەی ریڤەر پلێتی ئەرژەنتینی رایگەیاند یاریزانی لاوی هێڵی ناوەڕاست ئەریك مانویل لامێلا بە شێوەیەكی فەرمی بۆ ماوەی پێنج ساڵ پەیوەندی بە یانەی رۆمای ئیتالی كردووە، دانیال پاسارێلا سەرۆكی یانەی ریڤەر پلێت كە دابەزییە خولی یانە پلە دووەكانی ئەرژەنتین دووپاتیكردەوە كە لامێلا بووە یاریزانی یانەی رۆما.
رۆژنامەی لاگازێتا دیللۆ سپۆرت رایگەیاند بۆندی یاریزان لامێلا لە گەڵ یانەی رۆما بۆ ماوەی پێنج ساڵە و مووچەكەی دەگاتە یەك ملیۆن و پێنج سەد هەزار یۆرۆ لە ساڵێكدا، هەرچەندە نرخی بۆندی لامێلا ئاشكرا نەكراوە بەڵام راپۆرتە رۆژنامەوانییەكان دوپاتیان كردەوە كە نرخی بۆندەكە 12 ملیۆن یۆرۆیە، یانەی ریڤەر لە وەرزی رابردوو بۆندێكی یانەی میلانی رەتكردەوە بۆ كڕینەوەی یاریزان لامێلای تەمەن 19 ساڵ، هەروەها یانەكانی ناپۆلی ئیتالی و لیڤەرپول و تۆتنهام لە ئینگلتەرا و ئەتلەتیكۆ مەدریدی ئیسپانی داوای ئەم یاریزانەیان كردبوو، لە ساڵی 2004 یانەی بەرشلۆنە هەوڵی هێنانی لامێلای دابوو كە ئەو كات تەمەنی 12 ساڵ بوو.
لامێلا كە بە كاكای تازە ناسراوە خۆشحاڵی خۆی دەڕبری بە یاریكردنی لە خولی ئیتالیا بە تایبەتی كە یانەی رۆما یەكێكە لە یانە گەورەكانی ئیتالیا و ئەوروپا.