یەكێتی تۆپی باسكەی كوردستان بڕیاریدا پاڵەوانێتییەكی نێودەوڵەتی لە ئاستی كچان لە شاری هەڵەبجە ئەنجام بدرێت، لە لێدوانێكدا سەردار حەیدەر سەرۆكی یەكێتی تۆپی باسكەی كوردستان گوتی: بۆ پێشخستنی بواری تۆپی باسكە لەسەر ئاستی كچان لە كوردستان و هاندانی كچانی هەڵەبجە بۆ ئەوەی روو لە یاری تۆپی باسكە بكەن، یەكێتییەكەمان بڕیاری داوە پاڵەوانێتییەكی نێودەوڵەتی لە شاری هەڵەبجەی شەهید ئەنجام بدات.
لە درێژەی قسەكانیدا سەردار حەیدەر گوتی: لەم پاڵەوانێتییە هەر سێ یانەی خاوەن پلەی یەكەم و دووەم و سێیەمی خولی نایابی كوردستان لەسەر ئاستی كچان(ئەكاد، سەنحاریب، سیروانی نوێ) و یانەیەكی كوردستانی ئێران و یانەیەكی كوردستانی توركیا بەشداری تیاییدا دەكەن، بەڵام تا ئێستا كاتی ئەنجامدانی خولەكە و هەردوو یانەی كوردستانی توركیا و كوردستانی ئێران دیاری نەكراوە.
لە كۆتایی قسەكانیدا سەردار حەیدەر گوتی: ئێمە هەموو پێداویستییەكانمان دابین كردووە و تەنیا رەزامەندی یانەكان و هەندێك كاری رۆتین ماوە، ئینجا پاڵەوانێتییەكە بەفەرمی بەڕێوە دەچێت.