هەفتەی رابردوو لە یاریگەی دووەمی شەهید فرەنسۆ هەریری و بە سەرپەرشتی راهێنەری بەریتانی شاكێل ئەللاد یانەی هەولێر خولێكی راهێنەری بۆ منداڵانی شاری هەولێر كردووە بۆ ئەوەی بتوانێت كۆمەڵێك یاریزان بۆ داهاتوو پێیڕابگەیەنێت بۆ ئەوەی یانەی هەولێر لە دوا رۆژ سوودیان لێ وەربگرێت.
لەمبارەیەوە مەحموود عەزیز، سكرتێری یانەی هەولێر لە لێدوانێكی تایبەتدا گوتی: بۆ ئەوەی بتوانین یاریزان بۆ دوا رۆژ پێبگەیەنین، بڕیارمان دا خولێكی راهێنەران بۆ منداڵانی شاری هەولێر بكەینەوە، لەم خولە راهێنەرێكی بەریتانی خۆبەخش كار لەگەڵ ئەم منداڵانە دەكات، ئەم راهێنەرە خاوەن بڕوانامەی نێودەوڵەتییە لە راهێنەرایەتی و ناوبژیوانی و شارەزاییەكی باشی لە بواری پێگەیاندنی منداڵان هەیە، بۆیە چاوەڕوان دەكەین سوودێكی زۆر لەم راهێنەرە وەربگرین و هەوڵ دەدین ئەم خولە بەردەوام بێت، وەكو دەستەی كارگێڕی یانەی هەولێر هەموو پێداویستییەكان بۆ ئەم راهێنەرە دابین دەكەین بۆ ئەوەی لە كارەكەی سەركەوتوو بێت.
فۆتۆ: ئیسماعیل رەئوف