لە شاری لەندەن یارییەكانی پاڵەوانيیەتی ویمبلدۆنی كراوە لە یاری تێنسی سەر زەوی كۆتایی هات كە لە یاریگا چیمەنەكان ئەنجام دەدرێت، یاریزانی سيڕبی نۆڤاك جۆكۆڤیج لە سەر ئاستی پیاوان و كچە یاریزانی چیكی پیترا كڤیتۆڤا لە سەر ئاستی ئافرەتان نازناوەكەیان بۆ یەكەمجار لە ژیانی وەرزشیاندا بەدەست هێنا و كۆی خەڵاتەكانی ئەم پاڵەوانەتیيە دەگاتە 24 ملیۆن دۆلار، لە یاری كۆتایی ئافرەتاندا كچە یاریزانی كۆماری چیك پیترا كڤیتۆڤا رووبەڕووی كچە یاریزانی روسی شۆخ و شەنگ ماریا شاراپۆڤا بۆوە، لەدوای ئاستێكی بەرزەوە، كڤیتۆڤا بۆ یەكەمجار لە ژیانی وەرزشیدا نازناوەكەی بەدەست هێنا، دوای سەركەوتنی بەسەر شاراپۆڤا بە دوو كۆمەڵەی بێ بەرامبەر، ئەنجامی كۆمەڵەكان (6-4، 6-3) بوو، لەدوای تەواو بوونی یارییەكە كڤیتۆڤا خۆشحاڵی خۆی بەم دەسكەوتە دەڕبڕی و دووپاتیكردەوە هیوادارە ئەم نازناوە دوا نازناو نەبێت و گوتی : پێویستە ئاستی خۆم بەرەو پێش ببەم بۆ ئەوەی بتوانم لە هەموو یاریگاكان یاری بكەم، من حەز لە یارییەكانی كۆتایی دەكەم لە هەمان كاتدا حەز لە ئەنجامدانی یاری زەحمەت دەكەم.
لە یاری كۆتایی پیاواندا كە یاری لوتكە بوو، پۆلینكاری یەكەمی پێشووی جیهان ماتادۆری ئیسپانی رافاییل نادال لە بەرامبەر پۆلینكاری دووەمی پێشووی جیهان یاریزانی سیڕبی نۆڤاك جۆكۆڤیج یاری كرد، لە یارییەكی مێژوویی یاریزان جۆكۆڤیج بۆ یەكەمجار لە ژیانی وەرزشیدا بووە پاڵەوانی ویمبلدۆن دوای ئەوەی بە سێ كۆمەڵە بەرامبەر كۆمەڵەیەك لە نادالی بردەوە، ئەنجامی كۆمەڵەكان (6-4، 6-1، 1-6،6-3) بوو، لەم یارییەدا 15 هەزار كەس ئامادەبوون لە نێوانیاندا سەرۆكی سڕبیا بۆریس تادیچ كە لە خۆشیدا لە شوێنی خۆی هەڵپەڕی دوای سەركەوتنی جۆكۆڤیج، جۆكۆڤیچ بەم سەركەوتنە توانی پلەی یەكەمی ریزبەندی باشترین یاریزانی جیهانی لە نادال وەربگرێتەوە، لەدوای یارییەكە خۆشی جۆكۆڤیچ بێ وێنە بوو، تا گەیشتە ئەو رادیەی بەشێك لە چیمەنی یاریگاكەی خوارد، لە كۆنگرەیەكی رۆژنامەوانیدا جۆكۆڤیچ دەربارەی ئەم رووداوە گوتی: من هەستم كرد وەك ئاژەڵێك وام، من ویستم تامی چیمەنەكە بكەم، تامەكەی تا رادەیەك خۆش بوو، ئەوە باش بزانن من پلانم بۆ ئەم رووداوە دانه‌نابوو، نەمدەزانی چیم دەكرد لەبەر خۆشی و حەماسەتەوە.
بە تەواو بوونی یارییەكانی پاڵەوانییەتی ویمبلدۆن سێ پاڵەوانییەتی گراند سه‌لام لە كۆی چوار پاڵەوانییەتی كۆتایی هاتووە، پاڵەوانییەتی ئوستورالی كراوە پاڵەوانەكەی نۆڤاك جۆكۆڤیج بوو، پاڵەوانییەتی رۆلان گارۆس پاڵەوانەكەی رافاییل نادال بوو، پاڵەوانییەتی ویمبلدۆن پاڵەوانەكەی نۆڤاك جۆكۆڤیچ بوو، تەنها پاڵەوانییەتی ئەمریكای كراوە ماوە كە لەمانگی ئاب ئەنجام دەدرێت.