بە مەبەستی بەشداریكردن لە پاڵەوانێتی ئاسیا بۆ گۆڕەپان و مەیدان، هەفتەی رابردوو لە رێگەی فرۆكەخانی هەولێری نێودەوڵەتی شاندی هەڵبژاردەی عێراق بۆ گۆڕەپان و مەیدان لەسەر ئاستی كوڕان و كچان بەرەو ژاپۆن بەڕێكەوتن، لەلێدوانێكی تایبەتدا سەرتیپ فاریق ئەندامی یەكێتی گۆڕەپان و مەیدانی عێراق لە گوتی: هەفتەی رابردوو لە رێگەی فرۆكەخانەی هەولێری نێودەوڵەتی شاندی هەڵبژاردەی عێراق بەرەو وڵاتی ژاپۆن بەڕێكەوتین، بۆ ئەوەی بەشداری لە پاڵەوانێتی ئاسیا بكەین لەسەر ئاستی كوڕان و كچان، ئەم هەڵبژاردەیە لە 14 یاریزانی كور و كچ پێكهاتووە و تاڵیب فەیسەڵ سەرۆكی یەكێتی گۆڕەپان و مەیدانی عێراق سەرۆك شاندە و من كارگێری شاندەكەم.
لە درێژەی قسەكانیدا سەرتیپ فاریق گوتی: لەم شاندەدا تەنیا یاریزان گۆلستان مەحمود كچە یاریزانی شاری هەولێر كوردە. گولستان بەشداری لە راكردنی 400م و 800م و راكردنی پۆستەی 400*4م و راكردنی 100*4م دەكات و هیوای بە دەستهێنانی ئەنجامی باش لەم كچە یاریزانە دەكەین و وا بڕیارە بوو كچە یاریزانی شاری هەولێر بەهار خەسرۆیش لەم پاڵەوانێتییە بەشداری بكات، بەڵام بەهار لە وڵاتی توركیا بەشداری لە ئۆردوگای مەشقی هەڵبژاردەی عێراق نەكرد بۆیە لەم هەڵبژاردەیە دوورخرایەوە.
لە كۆتایی قسەكانیدا سەرتیپ فاریق گوتی: راهێنەری هەڵبژاردەی عێراق راهێنەرێكی جەزائیری-ە نوردین تاجەدین و ماوەی شەش مانگ دەبێت مەشق بە یاریزانانی هەڵبژاردەی عێراق دەدات لە شاری هەولێر.
جێگەی باسە وا بڕیارە سبەی 5ی ئەم مانگە پاڵەوانێتی ئاسیا لە وڵاتی ژاپۆن دەست پێ بكات.