سبەی سێشەممە لە شاری دهۆك پاڵەوانێتی رۆژئاوای ئاسیا بۆ تۆپی باسكە دەست پێ دەكات، پاڵەوانییەتییەكە لەسەر ئاستی كوڕان بۆ پێشكەوتووانە و ماوەی پێنج رۆژ دەخاینێت و هەریەكە لە وڵاتەكانی (عێراق – ئوردن – سوریا – لوبنان – ئێران) بەشداری لەم پاڵەوانێتییەدا دەكەن.
ئەم پاڵەوانێتییە بەسەرپەرشتی یەكێتی تۆپی باسكەی عێراق و بەهاوكاری یەكێتی تۆپی باسكەی كوردستان بەڕێوە دەچێت و زۆربەی خەرجییەكان دەكەوێتە سەر ئەستۆی یەكێتی تۆپی باسكەی عێراق و پارێزگای دهۆك بەڵێنی داوە لە لایەن مادیەوە یارمەتی یەكێتی تۆپی باسكەی عێراق بدات. بۆ ئەم مەبەستە چەندین لێژنەی تایبەت لە لێژنەی باڵا و لێژنەی راگەیاندن و لێژنەی ئەمنی و لێژنەی دارایی و لێژنەی میوانداریكردن و هتد. بۆ بەڕێوەبەردنی پاڵەوانێتییەكە داندراوە.
جێگەی باسە شاری دهۆك بۆ دووەمین جار میوانداری ئەم جۆرە پاڵەوانێتییە دەكات.