یاریزانی هەڵبژاردەی ئیسپانیا فرناندۆ تۆریس خۆشحاڵی خۆی بە تۆماركردنی گۆڵەكەی بەرامبەر هەڵبژاردەی ئەمریكا كە تیایدا ئیسپانیا بە ئەنجامی (4-0)گۆڵ یارییەكەی بردەوە، تۆریس لە لێدوانێكیدا گوتی: لەگەڵ دابەزینم بۆ ناو یاریگا هەستم بەدڵنیایی كرد، ساڵی رابردوو ساڵێكی ناخۆش بوو بۆ من تەنها دوو یارییم لەگەڵ ئیسپانیا ئەنجامدا، پێكانەكان رێگر بوون بۆ ئەوەی ئاستێكی باش پێشكەش بكەم، بەڵام ئێستا هەست بە خۆشحاڵی دەكەم، هەڵبژاردەكەمان سەركەوت و منیش گۆڵم تۆمار كرد.
لە لایەن خۆیەوە ڤیسینتی دیل پۆسكی راهێنەری هەڵبژاردەی ئیسپانیا ستایشی ئاستی تۆریسی كرد و گوتی: گۆڵەكەی تۆریس بۆ خودی خۆی زۆر گرنگ بوو، چونكە ساڵی رابردووی بۆ ئەم یاریزانە زۆر زەحمەت بوو، بەڵام تۆریس خاوەن كەسایەتیەكی بەهێزەو بەردەوام دەبێت وەك یاریزانێكی گرنگ بۆ ئێمە لە هەڵبژاردەی ئیسپانیا.
شایانی باسە یاریزان تۆریس لەگەڵ یانەی چێلسیش نەیتوانی ئاستێكی باش پێشكەش بكات و لە راپرسێكدا بەكاپتنی خەراپترین پێكهاتەی خولی یانە نایابەكانی ئینگلتەرا دەست نیشانكرا.