لە شاری سلێمانی لە هۆڵی نوی بە ئامادەبوونی دكتۆر ئاڵان قادر ئەمینداری گشتی لێژنەی ئۆڵۆمپی كوردستان و بێجان ئیبراهیم سەرۆكی یەكێـتی تۆپی دەستی كوردستان و چەندین بەرپرسی وەرزشی ژمارەیەك لە هاندەرانی یانەكانی تۆپی دەست و نوێنەران و یاریزانانی یانەكان ئامادەی مەڕاسیمی دابەشكردنی خەڵاتی پاڵەوانانی خولەكە بوون، یانەی سلێمانی پاڵەوانی خولەكە بوو بە كۆكردنەوەی 39خاڵ و خەڵاتی 7 ملیۆن دیناری وەرگرت و یانەی سیروانی نوی خاوەن پلەی دووەم بوو بە كۆكردنەوەی 33 خاڵ و خەڵاتی 6 ملیۆن دیناری وەرگرت و یانەی هەولێر خاوەن پلەی سێیەم بوو بە كۆكردنەوەی 32خاڵ و خەڵاتی 5 ملیۆن دیناری وەرگرت و یانەی دووزیش بە تیپی نمونەیی خەڵات كران.
سەبارەت بە چۆنیەتی بەڕێوەچوونی مەڕاسیمەكە بێجان ئیبراهیم سەرۆكی یەكێتی تۆپی دەستی كوردستان لە لێدوانێكیدا بۆ فایلی وەرزشی گوڵان گوتی:ئێمە لە شاری سلێمانی مەڕاسیمی كۆتایمان ئەنجامدا، چونكە یانەكانی پلەی یەكەم ودووەم لە سلێمانی بوون و لە بەرنامەماندا هەیە لە ئایندەیەكی نزیك پاڵەوانێتی تۆپی دەستی یانەكانی كوردستان بۆ ئاستی كچان وخولێكیش بۆ لاوانی یانەكانی كوردستان ئەنجام بدەین.
لە درێژەی قسەكانیدا بێجان ئیبراهیم گوتی: مەبەستمان لە كردنەوەی ئەم جۆرە خولانە خزمەتكردنی یاری تۆپی دەستە لە كوردستان و گەشە كردنی ئەو یارییە، خۆشبەختانە ئەمساڵ پاڵەوانیەتیەكەمان زۆر بەڕێك وپێكی ئەنجامداوە و ركابەرییەكی بەهێز لە نێوان یانەكان هەبوو.
شایەنی باسە لەم پاڵەوانێتیە هەشت یانە بەشدارییان كرد .