حوسێن سه‌عید ده‌ست له كار كێشانه‌وه‌ی خۆی راگه‌یاند
كه‌مێك پێش ئێستا به شێوه‌یه‌كی چاوه‌ڕواننه‌كراو، سه‌رۆكی یه‌كێتی تۆپی پێی عێراق حوسێن سه‌عید، له به‌یاننامه‌یه‌كدا ده‌ست له كار كێشانه‌وه‌ی خۆی راگه‌یاند.
له به‌یاننامه‌كه‌دا حوسێن سه‌عید هۆكاری ده‌ست له‌كاركێشانه‌وه‌كه‌ی خۆی بۆ ئه‌وه ده‌گه‌ڕێنێته‌وه كه ده‌یه‌وێت رێگه به كه‌سانی دیكه بدات خزمه‌تی تۆپی پێی عێراق بكه‌ن.
هه‌ر له‌و به‌یاننامه‌یه‌دا ئاماژه‌ی به‌وه‌شداوه، كه ماوه‌ی زیاتر له 35 ساڵه وه‌كو یاریزان، كارگێڕی، راهێنه‌ر، سه‌رۆكی یه‌كێتی تۆپی پێی عێراق خزمه‌تی تۆپی عێراقی كردووه.
ناوبراو سوپاسی ئه‌و لایه‌نانه‌شی كرد كه پشتگیری و هاوكاریان كردووه و هیواشی خواست توانیبێتی خزمه‌تی تۆپی پێی عێراق بكات.
شایه‌نی باسه، تا ئێستا یه‌كێتی تۆپی پێی عێراق سه‌رۆكێكی تازه‌ی بۆ یه‌كێتییه‌كه دانه‌ناوه تاكو به شێوه‌یه‌كی كاتی كاروباری ئه‌و یه‌كێتییه به‌ڕێوه ببات، واش چاوه‌ڕوان ده‌كرێت له چه‌ند كاتژمێری داهاتوودا یه‌كێتی تۆپی پێی عێراق كاردانه‌وه‌ی خۆی له‌سه‌ر ئه‌و بڕیاره رابگه‌یه‌نێت.
وا بڕیاره هه‌ڵبژاردنه‌كانی یه‌كێتی تۆپی پێی عێراق له 16ی ئه‌م مانگه له شاری به‌غدا به‌ڕێوه بچێت.
