یۆرگن كلوپ ڕاهێنەری یانە بروسیا دۆرتمۆند هەڵگری نازناوی بۆندسلیگای ئەڵمانیا پێی وایە تەنیا یانەی بەرشلۆنە لە كیشوەری ئەوروپا لە یانەی دۆرتمۆند باشترە، كلوپ كەتوانی لەگەڵ كۆمەڵێك یاریزانی لاو خولی ئەڵمانیا بەشایستەیی بباتەوە لە لێدوانێكی رۆژنامەوانیدا وتی: تەنیا بەرشلۆنە لە كیشوەری ئەوروپا لە یانەی دۆرتمۆند باشترە، لە یانەی بەرشلۆنە هەموو كارەكان نموونەیین، بەڵام وابزانم لە بوونی حەزی بردنەوە لە لایەن یاریزانەكانەوە و هەماهەنگی نێوان ئەندامانی تیپەكە هیچ یانەیەك لە یانەی دۆرتمۆند باشتر نییە.
سەبارەت بە یاریزان نوری شاهین كە یانەی دۆرتمۆندی بەجێهێشت و پێوەندی بە یانەی ریال مەدریدەوە كرد یۆرگن كلوپ دووپاتی كردەوە كە خەونی نوری شاهین یاریكردن بوو لە یانەی ریال بۆیە رێگایان پێدا ئەم خەونەی بهێنێتە دی و هیوای سەركەوتنی بۆ خواست.
شایانی باسە راهێنەر یۆرگن كلوپ توانی لەدوای نۆ ساڵ دابڕان نازناوی بۆندسلیگای بۆ یانەی دۆرتمۆند مسۆگەر بكات دوای ئەوەی توانی تیپێكی بەهێز ئامادە بكات و بە پێش یانە بەهێزەكان كەوت وەك بایرەن میونیخ و بایەرلیڤەركوزن.