هەفتەی رابردوو لە هۆڵی یانەی ئارارات لە شارۆچكەی پیرمام ئۆردوگای مەشقی هەڵبژاردەی عێراق لەسەر ئاستی كچان و كوڕان تەواو بوو بە مەبەستی خۆ ئامادەكردنیان بۆ پاڵەوانێتیەكانی داهاتوو، حوسێن عەبدولرەحمان جێگری سەرۆكی یەكێتی تایكواندۆی عێراق لە لێدوانێكی تایبەتدا گوتی: لە هۆڵی یانەی ئارارات ئۆردوگای مەشقی هەڵبژاردەی عێراق لەسەر ئاستی كوران و كچان تەواو بوو، لەم ئۆردوگایە 24 یاریزانی كچ، كە هەموویان كوردن بانگهێشتی هەڵبژاردەكە كرابوون و لەسەر ئاستی كوڕان ژمارەیەكی بەرچاوی یاریزانانی عێراق بەشداری لەم ئۆردوگایانە كرد.
لە درێژەی قسەكانیدا حوسێن عەبدولرەحمان گوتی: ئەم ئۆردوگایە بە مەبەستی دەستنیشان كردنی چوار یاریزانی كوڕ و چوار یاریزانی كچ بۆ ئەوەی نوێنەرایەتی هەڵبژاردەی عێراق بكەن لە یارییەكانی پاڵاوتن بۆ ئۆڵۆمپیادی لەندەن 2012، كە یارییەكانی پاڵاوتن لە ئۆزباكستان ئەنجام دەدرێت لەم 8 یاریزانی كوڕ و كچ نێوەی یاریزانانی كورد دەبن.
لە كۆتایی قسەكانیدا حوسێن عەبدولرەحمان گوتی:ئەم ئۆردوگایە ماوەی 7 رۆژی خایاند و بەسەرپەرشتی راهێنەرێكی ئێرانی و دوو راهێنەری كورد یاریدەدەری ئەم راهێنەرە بوون ئەویش هەریەكە لە شوان محەمەد و كچە راهێنەر ئەلمێرا ئەحمەد رەسول و بە كردنەوەی ئەم جۆرە ئۆردوگا مەشقیانە هەوڵ دەدین كچە یاریزانانی كورد بگەنە ئاستێكی بەرز و بتوانن دەستكەوتی مەزن بە دەستبهێنن.