بە ئامادەبوونی سەرۆكی لیژنەی ئۆلۆمپی هەرێمی كوردستان و سەرجەم ئەندامانی كۆمیتەی تەنفیزی لێژنەكە، لە بارەگای لیژنەی ئۆڵۆمپی هەرێمی كوردستان كۆبوونەوەی ئاسایی ئەنجامدرا، لە كۆبوونەوەكەدا چەندین تەوەر خرانە بەر باس و گفتوگۆكردن،ئەم بڕیارانەی خوارەوە دران.
1- سەبارەت بە پێوەندی نێوان لێژنەی ئۆڵۆمپی كوردستان و وەزارەتی وەرزش و لاوانی عێراق و لێژنەی ئۆڵۆمپی عێراق، بڕیاردرا بە پێكهێنانی لیژنەیەك بۆ سەردان كردنی شاری بەغدا و گفتوگۆكردن لە بارەی ئەو كێشانەی كە لە نێوان وەرزشی كوردستان و عێراقدا هەیە، بە هەماهەنگی لەگەڵ سەرۆك و ئەندامانی لێژنەی وەرزشی لە پەرلەمانی عێراق و نوێنەرەكانمان لە عێراق.)
2- سەبارەت بە هەڵبژاردنی نوێنەرایەتی لێژنەی ئۆڵۆمپی لە شارەكان، لە رۆژانی داهاتوو لە عێراق ئەنجام دەدرێت بڕیاردرا بە ئەنجامدانی هەڵبژاردنی هەردوو نوێنەرایەتی سلێمانی و دهۆك بۆ ئەم مەبەستەش لێژنەیەك پێكهێنرا بە سەرۆكایەتی (سەڵاح حەسەن خەسرۆ) و ئەندامێتی(سەفین كانەبی و سەڵاح محمد كەریم و سەعید ئەحمەد و دكتۆرە كەژاڵ كاكە حەمە).
3-دەربارەی لقی یەكێتیە وەرزشیەكان بڕیاردرا دوای ئەنجامدانی هەڵبژاردنی هەردوو نوێنەرایەتیەكە چارەسەری كێشەكانیان بكرێت و سەبارەت بە لقی یەكێتیە وەرزشییە تاكەكان كۆمیتەی تەنفیزی لێژنەی ئۆڵۆمپی كوردستان بڕیاریدا بری یەك ملیۆن و پێنج سەد هەزار دینار زیاد بكرێت و بدرێتە بەو فێركارانەی، كە لە هەڵبژاردەی شارەكان كار دەكەن و سەر بەهیچ یانەیەك نین.
4- لە بارەی هەڵبژاردنی یەكێتی تۆپی پێی عێراق، كە وابڕیارە لە 7-6 ئەنجام بدرێت،كۆمیتەی تەنفیزی هەڵوەستەی لەسەر كرد و بریاردرا لە ئاییندەیەكی نزیكدا كۆبوونەوە لەگەڵ هەر 15 نوێنەرەكەی كوردستان ئەنجام بدات، كە مافی دەنگدانیان هەیە، بۆ ئەوەی بەلایەنی كەم چوار نوێنەری كوردستان دەستنیشان بكرێت بۆ هەڵبژاردنی ئاییندەی یەكێتی تۆپی پێی عێراق.
5-سەبارەت بە یاسایی لێژنەی ئۆلۆمپی هەرێمی كوردستان بڕیار درا بەدواداچوونی زیاتری بۆ بكرێت و سەردانی پەرلەمانی كوردستان بكرێت بۆ ئەوەی بە زووترین كات خوێندنەوەی بۆ بكرێت.
6-بڕیاردرا بە دانانی بری شەش ملیۆن دینار بۆ چالاكییەكانی ئافرەتان لە هەر چوار پارێزگاكەی كوردستان لە رێگای نوسینگەی ئافرەتانی لێژنەی ئۆلۆمپی هەرێمی كوردستان بە هەماهەنگی لەگەڵ لیژنەی ئۆلۆمپی هەرێمی كوردستان.