ئەستێرەی بەناوبانگی ئینگلیزی دێڤید بێكهام تووشی رووداوێكی هاتوچۆ هات لە رێگای خێرا لە باشووری ویلایەتی كالیفۆرنیای ئەمریكی بەبێ ئەوەی تووشی هیچ ئازارێك بێت، جەنیڤەر كۆنۆلی خانمە ئەفسەری هاتوچۆ لە كالیفۆرنیا بە گۆڤاری بیبۆلی راگەیاند كە ئۆتۆمبیلێك لە جۆری میتسۆبیشی لە دواوە بە ئۆتۆمبیلەكەی بێكهام كەوت كە لە جۆری كادیلاكە، بەڵام لەم رووداوەدا بێكهام و كوڕەكەی برۆكلین كە لەگەڵ باوكی بوو تووشی هیچ ئازارێك نەهاتن لەو كاتەی شۆفێرەكەی دیكە بە سووكی بریندار بوو و گواسترایەوە نەخۆشخانە بۆ چارەسەركردن.
یایزان دێڤید بێكهام كە ئێستا لە یانەی لۆس ئەنجلۆس گەلاكسی یاری دەكات و پێشتریش لە یانەكانی مانچستەر یونایتد و ریال مەدرید یاری كردووە دووچاری رەخنەیەكی بەهێز بوو لەلایەن هاندەرانی یانەكەی دوای ئەوەی یانەكەی جێهێشت بۆ بەشداریكردن لە ئاهەنگی هاوسەری شازادە ویلیام و كێت میدڵتۆن لە شاری لەندەن و گەڕانەوەی لە ماوەی 24 كاتژمێر بۆ بەشداریكردن لە یارییەكی خولی ئەمریكا، بەڵام بێكهام ئاستێكی خەراپی پێشكەش كرد و یانەكەی ئەم یارییەی دۆڕاند.
بێكهام و خێزانەكەی ڤكتۆریا لەگەڵ سێ منداڵەكەی لە شاری لۆس ئەنجلۆس دەژین و چاوەڕێی منداڵی چوارەمیان دەكەن لە مانگی تەمموزی داهاتوو، شایەنی باسە بۆندی یاریزان بێكهام لەگەڵ یانەی لۆس ئەنجلۆس لە مانگی تشرینی دووەمی داهاتوو كۆتایی دێت و بێكهام بە نیازە پێوەندی بە یانەیەكی خولی ئینگلتەرا بكات.