لە ئەنجامێكی چاوەڕوان نەكراودا كچە یاریزانی تێنسی سەر زەوی ئەڵمانی نەناسراو جۆلیا جۆرجیۆز نازناوی پاڵەوانیەتی شتوتگارتی كراوەی ئافرەتانی بەدەست هێنا كە كۆی خەڵاتەكانی 721 هەزار یۆرۆ بوو دوای ئەوەی لە یاری كۆتایی لە پۆلینكاری یەكەمی جیهان كچە یاریزانی دانیماركی كارۆلین ڤۆزنیاكی بردەوە بە دوو كۆمەڵەی بێ بەرامبەر، ئەنجامی كۆمەڵەكان (7-6، 6-3) بوو، یاریەكەش یەك سەعات و 39 خولەكی خایاند.
جۆلیا تەمەن 22 ساڵ بووە یەكەم كچە یاریزانی ئەڵمانی كە ئەم نازناوە بەدەست دەهێنێت لە دوای ساڵی 1994 كە ئەو كات كچە یاریزان ئەنكە هوپەر نازناوەكەی بەدەست هێنابوو، ئەم نازناوەش دووەمین نازناوی جۆلیایە لە ژیانی وەرزشیدا لە دوای نازناوی پاڵەوانیەتی بادگایشتاین لە وڵاتی نەمسا لە رۆژی 19-7-2010، بەم سەركەوتنە جۆلیا هاتە پلەی 27ی ریزبەندی یاریزانە پیشەگەرەكان.
لە بەرامبەردا بە دۆڕاندنی لەم یارییە ڤۆزنیاكی دووەم یاری كۆتایی لە ساڵی 2011 لەدەستدا دوای دۆڕاندنی لە یاری كۆتایی پاڵەوانیەتی دەوحەی كراوە لە بەرامبەر كچە یاریزانی روسی ڤێرا زڤۆناریڤا، بەڵام ڤۆزنیاكی پارێزگاری لە پلەی یەكەمی ریزبەندی یاریزانە پیشەگەرەكان كرد.