تیپی تۆپی دەستی یانەی سلێمانی یەكێكە لە تیپە بەهێزەكان لەسەر ئاستی كوردستان و عێراق، بەیەكێك لە كۆنترین یانەی تۆپی دەست دەژمێردرێت لەسەر ئاستی كوردستان كە مێژووەكەی بۆساڵی 1956دەگەڕێـتەوە، لەگەڵ دامەزراندنی یانەكە ئەو تیپەش دروستكراوە، چەندین ئەنجامی بەرچاوی بەدەست هێناوە لەسەر ئاستی كوردستان و عێراق، ئەمساڵیش نیازی تۆماركردنی سیناریۆیەكی دووبارەی لەبەردەمە بۆئەوەی ببێتە پاڵەوانی هەردوو خولی نایابی یانەكانی كوردستان و عێراق ئێمەش ئەم ڕاپۆڕتەمان ئەنجامدا.كوردۆ عەبدول قادر ڕاهێنەری تیپی تۆپی دەستی یانەی سلێمانی لە بارەی ئاستی یانەكەیان وتی «لە ئێستادا ئاستی تۆپی دەستی لە كوردستاندا لەچاو ساڵانی ڕابردوودا زۆر بەرەو پێشچووە، ئاستی یانەی سلێمانیش لە باشترین ئاستدایە لەسەر ئاستی كوردستان، ئێمەش هەردەم هەوڵمان داوە ئاستی تیپەكە بەرەو پێشتر ببەین، چەند یانەیەكیش هەیە لە كوردستان لەگەڵ ئێمە ڕكابەری دەكەن لەسەر بەدەستهێنانی نازناو، وەكو یانەكانی هەولێر و سیروانی نوێ، لە بارەی كێشەكانی یانەكەشیان وتی «ئێمەهیچ كێشەیەكمان نییە، جگە لە نەبوونی توانایەكی دارایی باش ئەویش وایكردووە كە برایەتی یاریزانانی یانەكە ئەو كێشەیەش بەلاوە نێن، 17یاریزانمان هەیە گشت یاریزانەكان خەڵكی شاری سلێمانین، بۆ بەرەو پێشچوونی ئەو یارییەش ناوبراو وتی «ئێمە پێشنیار دەكەین كەوا ئەم پاڵەوانەتیانە ساڵانە زیاد بكرێن، نەك تەنیا ئەنجامدانی یەك پاڵەوانیەتی بەتەنیا ماوەی خولەكانیش زیاتر بێت، بۆئەوەی ماوەی ئامادەكردنەكان زیاتر بێت. یاریزانەكان ئاشنایەتیان لەگەڵ یەك زیاتر دەبێت. ئەگەر بشكرێت بودجەی ئەو خولە زیاتر بێت و هەفتەی یەك یاری ئەنجام بدرێت. وتیشی ئەو یارییە یارییەكی قورسە بۆیە هەموو كەسێك خۆی لێ نادات و یانەكانی كوردستانیش ژمارەیان كەمە، لە كوردستانیش تەنیا گرنگی بە یاری تۆپی پێ دەدرێت. دەبێت قوتابخانەی پێگەیاندنی یاریزانانیش هەبێت بۆیاری تۆپی دەست تاكو تیپێكی بەهێز دروست بكەیت.
ئەمین عەلی محەمەد سەرپەرشتیاری تۆپی دەستی یانەی سلێمانی وتی «یانەی سلێمانی لە ئاستێكی بەرزدایە لە یارییەكانی خولی نایابی كوردستانیش ئاستێكی بەرزمان پێشكەش كردووە، من وا پێشبینی دەكەم كەوا ئاستی تۆپی دەست لە شاری سلێمانی لە پێشەنگی شارەكانی كوردستان دێت، چونكە تیپەكانی شاری سلێمانی ڕكابەری یانەكانی تری كوردستان دەكەن، لە ئێستاشدا ئێمە كار بۆئەوە دەكەین ببینە پاڵەوانی یانەكانی كوردستان، دواتریش لە خولی عێراق بتوانین ئاستێكی شایستەتر لە خولی كوردستان پێشكەش بكەین و لەوێش نازناوەكە بۆ كوردستان بهێنینەوە. وتیشی كێشەو گرفتێكی وامان نییە، لە بارەی پرۆگڕامەكانی تیپەكەش ناوبراو وتی «ژمارەیەك یاریزانی لاومان هەیە لە تیپی لاوانی یانەكەمانن بەسەرخستنیان بۆتیپی یەكەم سوودی زۆریان لێ ببینین هەموو پێداویستیەكانمان بۆیان دابین كردوون، وتیشی یانەكانی سیروانی نوێ و هەولێر ڕكابەری ئێمە دەكەن لەبەدەستهێنانی ناوناوەكان و لە ئێستاشدا بەرنامەمان ئەوەیە بتوانین لە خولی نایابی عێراق ئاستێكی بەرز پێشكەش بكەین و ئامادەكاری باشمان كردووە.
بڕوا عوسمان گۆڵچی تۆپی دەستی یانەی سلێمانی وتی «ئاستی تۆپی دەستی لە شارەكانی كوردستان لە ئاستێكی بەرزدایە، بەتایبەتی لە شاری سلێمانی كە یانەكانی ئەو شارە گرنگی تایبەت بە یاری تۆپی دەست دەدەن، لە یانەی سلێمانیش گرنگی زۆر دەدرێت بە یاری تۆپی دەست، ئێمەش هەموو هەوڵێكمان بۆئەوەیە ناوی شارەكەمان بەرز بكەینەوە، لە ئێستاشدا ئێمە بە كۆمەڵێك یاریزانی خوێن گەرمەوە رۆژانە خەریكی مەشق و ڕاهێنانین بۆئەوەی بگەینە ئەو هیوایەی كە هەمانە ئەویش بەدەست هێنانی نازناوی زۆرە بۆشاری سلێمانی، چونكە مێژوویەكی زۆرمان هەیە لەسەر ئاستی كوردستان و عێراق، بەهیوای ئەوەشم بتوانین هەردوو نازناوی خولی نایابی كوردستان وعێراق بۆخۆمان مسۆگەربكەین، لە بارەی كێشەكانیشیان وتی ئێمە كێشەی نەبوونی یاریگە و خزمەتگوزاریمان هەیە لە یانەكە هەر چەندە دەستەی كارگێڕی یانەی سلێمانیش كەمتەرخەمیان نەكردووە، وتیشی لە كوردستان هەریەك لە یانەكانی هەولێر و سیروانی نوێ بە ڕكابەری خۆمان دەزانین .
مەحەمەد هەڵۆ یاریزانی تۆپی دەستی یانەی سلێمانی وتی «ئاستی ئەم یارییە لە كوردستاندا ئێستا رۆژ بەرۆژ بەرەو پێشچوونی باش بەخۆیەوە دەبینێ، ئێمەش لە شاری سلێمانی گرنگی زۆر بە یاری تۆپی دەست دەدەین، هەر بۆیە رۆژ بە رۆژ ئاستی یانەی سلێمانی لەبەرز بوونەوەدایە، وتیشی پێم باشە بۆبەرەو پێشچوونی یاری تۆپی دەستی لە كوردستان گرنگی بە تیپەكانی لاوان بدرێت و خولی زیاتریان بۆبكرێتەوە و پشتگیری بكرێن، بەڵام لە كوردستان تەنیا گرنگی بە یاری تۆپی پێ دەدرێت، وتیشی ئێستا لە یانەی سلێمانی ئێمە هەوڵ دەدەین نازناوی هەردوو خولی نایابی یانەكانی كوردستان و عێراق بۆخۆمان مسۆگەر بكەین، كێشەیەكی وامان نییە شایەنی باس كردن بێت. ڕكابەری لە نێوان یانەكانی كوردستان باشە بە تایبەتی لە نێوان یانەكانی هەولێر و سلێمانی و سیروانی نوێ، بەڵام بە پاڵپشتی دەستەی كارگێڕی و یاریزانان هەوڵدەدەین بگەینە لوتكەی یانەكانی كوردستان.