رزان خالید یاریزانی هەڵبژاردەی ئوردن بۆ بادمنتۆن و پاڵەوانی عەرەب لەم یارییە، رزان لە دایكبووی ساڵی 1989ی ئوردنەو قوتابی كۆلێژە، ئەم كچە یاریزانە یەكێكە لە یاریزانە هەرە بە تواناكانی وڵاتی ئوردن و دواڕۆژێكی گەش چاوەڕوانی ئەم یاریزانە دەكات، لە زۆربەی یارییەكان بە یەك ئاست یاری دەكرد و ئاستێكی بەرزی پێشكەش دەكرد، بۆیە بە پێویستمان زانی لە نزیكەوە ئەم چاوپێكەوتنی لەگەڵ ئەنجام بدەین.

* رێكخستنی پاڵەوانیەتی عەرەب بۆ بادمنتۆن لە هەولێرت چۆن بینی؟
- ئەوەی راستی بێت ئەم پاڵەوانیەتیە لە رووی رێكخستنەوە زۆر سەركەوتوو بوو، ئەمە یەكەمجارە پاڵەوانیەتی عەرەبی لە رووی رێكخستنەوە بەمشێوە پێشكەوتووە ببینم و هیوادارم گشت پاڵەوانیەتیەكان بەمشێوەیە سەركەوتوو بێت.
* ئایا هاتنتان بۆ هەولێر هیچ كێشەیكی بۆ دروست كردن؟
- نەخێر، هیچ كێشەیكی بۆ دروست نەكردین و هەولێر شارێكی ئارامە و هیچ كێشەی نییە.
* شاری هەولێرت چۆن بینی؟
- شارێكی زۆر خۆشە و ئارامە و كەشوهەوای لەگەڵ وڵاتی ئوردن هیچ جیاوازییەكی نییە، بۆیە هەست بە خۆشیەكی زۆر دەكەم لەم شارە.
* گرنكترین دەستكەوتەكانت چین؟
- پاڵەوانی عەرەب لەسەر ئاستی تازەپێگەیشتووان و هەروەها توانیم دووجار لەسەر یەك پلەی یەكەم لەسەر ئاستی عەرەب بە دەست بهێنم لە یاری دووانەی تێكەڵاو و بەشداری چەندین پاڵەوانیەتیم لەسەر ئاستی ئاسیا و جیهان كردووە بە رێژەی دوو پاڵەوانیەتی لە ساڵێكدا.
* ئایا یەكێتی بادمنتۆنی ئوردن تۆ بۆ دواڕۆژ پێڕادەگەینێ؟
- ئەوەی راستی بێت لەگەڵ هاتنم بۆ نێو یاری بادمنتۆن لەسەر دەستی راهێنەرێكی ئێران بۆ ماوەی سێ ساڵ مەشقم كرد، بۆیە ئاستم بەرز بۆوە و حەز دەكەم لە دواڕۆژ بگەمە ئۆڵۆمپیاد، پەنا ب خوا ئەم خەونەم دێتە دی.