دوای ئەوەی محەمەد بن هەمام سەرۆكی یەكێتی تۆپی پێی ئاسیا گەیشتە هەولێری پایتەخت، بە مەبەستی بەسەركردنەوەی پڕۆژە وەرزشییەكان، لەهەمان كاتدا جێگری سەرۆكی یەكێتی تۆپی پێی ئاسیا و سەرۆكی لیژنەی ناوبژیوانانی ئاسیا یوسف سركال لەگەڵ شاندەكە بوو، یوسف سركال دووەم گەورەترین كەسایەتی وەرزشیە لە ئاسیا و پێشتر سەرۆكی یەكێتی تۆپی پێی ئیمارات بووە، دواتر دەستی لەكار كێشاوە و خۆی بۆ جێگری سەرۆكی یەكێتی تۆپی پێی ئاسیا پاڵیوراو كرد و توانی ئەم پۆستە وەربگرێت، بەپێوستمان زانی لەنزیكەوە دیمانەیەكی تایبەت بە گۆڤاری گۆڵان لەگەڵیدا ئەنجام بدەین.
* هۆكاری سەردانەكت بۆ هەولێر چ بوو؟
- جێگەی شانازییە بۆ من كە سەردانی هەولێری پایتەختی هەرێمی كوردستان بكەم، بۆ ئەوەی لە نزیكەوە ئاگاداری بارودۆخی وەرزشی بم لە كوردستان و عێراق بەتایبەتی یاری تۆپی پێی.
* چۆن دەڕوانیە بایەخی حكومەتی هەرێمی كوردستان بۆ وەرزش؟
- ئەوەی راستی بێت دوای ئەم سەردانە لە نزیكەوە ئاگاداری بایەخی حكومەتی هەرێمی كوردستان بووین كە بە وەرزشی دەدات، بۆ ئەوەی ئاستی وەرزش پێش بكەوێت و بگاتە ئاستی جیهان، ئەمەش جێگەی دڵخۆشیە.
* چۆن دەڕوانیتە یاریگە وەرزشییەكانی كوردستان؟
- سەردانی گشت یاریگاكانی هەولێری پایتەختمان كرد، بەڕاستی یاریگاكان جێگەی دڵخۆشیە، چونكە بوونی ئەمجۆرە یاریگایانە دەبێتە هۆكاری دروستبوونی یاریزان بۆ دواڕۆژ.
* شاری هەولێرت چۆن بینی؟
- بەڕاستی شارێكی خۆشە و جوانە و خەڵكەكەی وەرزشوانە و زۆریان حەزیان بە وەرزشە و بایەخی پێ دەدەن، شارێكی پێشكەوتووە و چاوەڕوان دەكەم لە چەند ساڵی داهاتوو زیاتر پێش بكەوێت لە هەموو روویەكەوە و یانەی هەولێریش ببێتە گەورەترین یانە لەسەر ئاستی عێراق.
* یانەی هەولێرت چۆن بینی؟
- یانەی هەولێر یانەیەكی پێشكەوتووە لەسەر ئاستی عێراق، یاریگای گونجاوی هەیە بۆ بەڕێوەچوونی یارییە نێودەوڵەتییەكان و ئێستا چەندین پڕۆژەی بازرگانی تایبەت بە یانەكە هەیە بۆ ئەوەی لە دواڕۆژ پشت بەخۆی ببەستێت بۆ دابینكردنی داهات و خاوەن دەستەی كارگێڕی و سەرۆكێكی نموونەییە، پێشبینی دەكەم ئەم یانەیە زیاتر پێش بكەوێت لە هەموو روویەكەوە و هیوای سەركەوتنیان بۆ دەخوازم.
* چۆن دڕوانیە ئاستی ناوبژیوانانی عێراق؟
- وەكو سەرۆكی لیژنەی ناوبژیوانانی ئاسیا، ئاستی ناوبژیوانەكانی عێراق پێشتر باشتر بوو لە ئێستا، ئەمەش بەهۆی ئەوەی عێراق بە چەندین كێشە تێپەڕ بووە، بۆیە ئاستی ناوبژیوانەكان و وەرزش لە عێراق بە گشتی دابەزیوە، بەڵام پەنا بەخوا دووبارە عێراق دەگەڕێتەوە دۆخی جارانی خۆی و ئێمە یەكێتی تۆپی پێی ئاسیا بە هاوكاری یەكێتی تۆپی پێی عێراق گشت هەوڵێكمان دەخەینە گەڕ بۆ ئەوەی ئاستی تۆپی پێی لە عێراق پێش بكەوێت.
* بۆچی سەرۆكایەتی یەكێتی تۆپی پێی ئیماراتت جێهێشت؟
- لەبەر چەند هۆكارێكی تایبەت بە خۆم و رێگەم بۆ كەسانی تر كردەوە بۆ ئەوەی بێنە نێو یەكێتی تۆپی پێی ئیمارات، بەڵام خەلفان رمیسی بووە سەرۆكی یەكێتی تۆپی پێی ئیمارات، ئێستا تۆپی پێی ئیمارات پێشكەوتووە و زیاتر بایەخی پێدەدرێت، بەڵگەشم بەدەستهێنانی هەڵبژاردەی ئۆڵۆمپی ئیمارات بۆ جامی كەنداو لەسەر ئاستی هەڵبژاردە ئۆڵۆمپی و هەروەها بە سەركەوتنی هەڵبژاردەی لاوانی ئیمارات بۆ جامی جیهانی لەسەر ئاستی لاوان.
* دوا وتەت چییە؟
- هیوای سەركەوتنتان بۆ دەخوازم و بەڕاستی لەگەڵ گەیشتنم بۆ هەولێر پێشوازییەكی زۆریان لێكردم، ئەمەش زۆر دڵی خۆش كردم و هیوادارام زیاتر وەرزش پێش بكەوێت لە كوردستان و عێراق.